सरकार केही गर्न नसक्ने अवस्थामा आएपछि भ्रष्टाचार विरोधी अभियान भनेर एमालेतिर खनिएको छः ओली

२६ असार, काठमाडौं । नेकपा एमालेका अध्यक्ष केपी शर्मा ओलीले अहिलेको सरकारको तागत झुट बोल्ने र अफवाह फैलाउन रहेको बताएका छन् । वाग्मती प्रदेश संगठन कमिटीको सातौँ बैठकलाई सम्बोधन गर्दै उनले सरकारले हल्ला फैलाउने काम मात्रै गरेको बताए ।

ओलीले केही काम गर्न नसकेपछि सरकारले भ्रष्टाचार विरोधी अभियानका नाममा पोलिटिकल स्टन्ट मात्र गरेको बताएका छन् । उनले भ्रष्टाचारविरोधी काममा सरकारको योगदान नै नभएको बताए । भुटानी शरणार्थी प्रकरणमा १९ जेठ २०७९ मै प्रहरी कहाँ निवेदन परेको भए पनि अहिले सरकारमा भएकाहरुले ढाकछोप गरेको र बाहिरिएपछि अघि बढाएको उनले बताए । 

यो नियमित प्रक्रियाअनुसार अघि बढेको भन्दै उनले हामीले गर्यौं भन्नु व्यर्थको पोलिटिकल स्टन्ट मात्र भएको उनले बताए । ओलीले अहिलेको सत्ता गठबन्धनमा उस्तै उस्तै दलहरू रहेकाले गठबन्धन कायम गर्न चाहिरहेको पनि बताए । सरकारको तागत झुट बोल्ने, अफवाह फैलाउने देखियोे, उस्तै उस्तै मिलेकाले, गठबन्धन भएकाले गठबन्धन कायम राख्न चाहन्छन्, उनले भने  

ओलीले एमालेको नीति प्रष्ट रहेको बताए । उनले एमालेको नजर सरकारतिर नरहेको बताए । एमाले मिसन ०८४ मा हिँडेको र नीतिहरु स्पष्ट भएको उनको भनाइ छ । ओलीले अहिलेको सत्ता गठबन्धन एमालेविरुद्ध हल्ला फैलाउन लागिपरेको पनि बताए । उनले आफूहरूलाई बदनाम गराउने कदम चालिएको बताए । उनले एमालेकै नेता कार्यकर्ता पार्टीको प्रचारमा नलागेको पनि बताए । प्रायः साथीहरू हाम्रा कामबारे भन्नुहुन्न, सरकारमा हुँदा यो गरियो भनेर कोही बोल्दैन, हामीले गरेको काम भन्नुपर्याे, उनले भने ।

ओलीले पशुपतिको जलहरुको विषयमा पनि झुटा कुरा फैलाइएको बताए । सुनको जलहरीलाई पित्तलको चुनिएको उनको भनाइ छ । सुनको जलहरी होइन, पित्तल चढाए भनेर तामिल गरेर संसदमा लगिन्छ, झुटा अफवाह फैलाएबापत लाज सरम छैन, उनले भने  ।