एमालेले पार्टीका विभाग र जनसंगठनलाई सशक्त बनाउन नयाँ रणनीति अंगीकार गर्ने

२८ असार, काठमाडौं । नेकपा एमालेले पार्टी नेतृत्वको निर्देशन अनुसार पार्टीका विभाग र जनसंगठनहरुले काम गरे नगरेको समीक्षा गर्ने भएको छ । पार्टीका विभागहरूको काम प्रभावकारी हुन नसकेपछि यसको समीक्षा गर्दै आगामी दिनमा कसरी अगाडि जाने भन्ने कार्य योजनासमेत बनाउने बताइएको छ । यसका लागि असार ३० गते सचिवालय बैठक डाकिएको छ । 

बैठकमा पछिल्लो राजनीतिक परिस्थितिबारे पनि समीक्षा गर्ने जनाइएको छ । ललितपुर, च्यासलस्थित पार्टी मुख्यालयमा यही असार ३० गते सचिवालय बैठक डाकिएको एमालेले जनाएको छ । बैठकमा अहिले भइरहेको राजनीतिक विकासक्रमको समीक्षा, कार्य विभाजनअनुसार कामको मूल्यांकन, पार्टी स्कुल विभाग, पार्टी प्रचार र जनसंगठनको कामको अवस्था र अब पार्टीलाई कसरी लैजाने भन्ने विषयमा छलफल हुनेछ ।

बैठकका एजेण्डाबारे पार्टी अध्यक्ष केपी शर्मा ओलीले बुधबार पार्टीका उपाध्यक्षसँग पार्टी गतिविधिबारे छलफल गरेका थिए ।  ओलीले उपाध्यक्षहरूसँग पार्टीको गतिविधि र आगामी बस्ने सचिवालय बैठकको तयारीबारे छलफल गरेका हुन् । छलफलमा वरिष्ठ उपाध्यक्ष ईश्वर पोखरेल, उपाध्यक्ष द्वय अष्टलक्ष्मी शाक्य, रामबहादुर थापा, सुरेन्द्र पाण्डे, युवराज ज्ञवाली, सुभासचन्द्र नेम्वाङ र विष्णुप्रसाद पौडेल सहभागी थिए ।