पालिकाको निर्णय लत्याउँदै मनपरी शुल्क उठाउँदै विद्यालय

•दीपक शर्मा 

२९ असार, बर्दिया । नगरपालिकाले कुनै पनि बहानामा सामुदायिक विद्यालयले विद्यार्थीबाट शुल्क नलिन गरेको निर्देशनलाई बर्दियाका केही विद्यालयले लत्याइदिएका छन ।  बर्दियाको बारबर्दिया नगरपालिकामा रहेको अमर सहिद दशरथचन्द मावि खैरेनीले अभिभावकसँग तोकेरै शुल्क लिएको पाइएको हो ।

विद्यालयले कक्षा १ देखि ३ सम्म प्रति विद्यार्थी १ सय रूपैयाँ , कक्षा ४ देखि ७ सम्मको लागि २ सए रूपैयाँ र ८ कक्षा देखि १० कक्षा सम्मको लागि ३ सय रूपैयाँ विना रसिद रकम उठाइरहेको पाइएको हो । नगरपालिकाले नगरभित्रका सामुदायिक विद्यालयहरूलाई आफू खुशी विद्यालय शुल्क नलिन निर्देशन दिएकोमा त्यसलाई चुनौती दिँदै सो विद्यालयले शुल्क उठाउने गरेको अभिभावकहरूको भनाई रहेको छ  ।

पालिकाले आधारभूत अनिवार्य तथा निःशुल्क र माध्यमिक तह निःशुल्क घोषणा गरिएको स्मरण गराउँदै पालिकाले सूचना निकालेरै कुनै पनि शुल्क नलिन निर्देशन दिएको हो । पालिकाले दिएको निर्देशन विपरीत शुल्क लिइएको पाइएमा पचलित कानुन बमोजिम कारबाहीको चेतावनी दिएको भएपनि विद्यालयले आफू खुसी विभिन्न बहानामा शुल्क उठाउने गरेका हुन ।

विना रसिद तोकेरै अभिभावकसँग रकम माग गरिएको विषयमा विद्यालयका प्रधानाध्यापक छविलाल पोख्रेललाई सम्पर्क गर्दा उनले जवरजस्ती शुल्क नमागिएको अभिभावकले स्वेच्छाले दिएको दावी गरे ।  उनले विद्यालयको अन्य स्रोत नभएको हुँदा केही कामका लागी तोकेरै नभएर अभिभावकसँग सहयोग मागेको बताए, साथै उनले जवरजस्ती भने नगरेको बताए ।

अभिभावकसँग विद्यालयलाई सहयोग माग गरेकोमा केही अभिभावकले दिन नसक्ने भने पछि परीक्षामा सहभागी नगराइने भन्दै विद्यालयले जवरजस्ती गरेको अभिभावकहरूको भनाई रहेको छ ।