मुटुको रक्षा गर्न दैनिक १० देखि १५ मिनेटसम्म हाँस्नुस

२९ असार, काठमाडौं । हँसमुख रहनुले केवल तपाइँको स्वभावलाई मात्र दर्शाउँदैन यसले तपाइँको सकारात्मक व्यक्तित्व समेत प्रदर्शित गर्दछ । डाक्टरहरुका अनुसार हाँस्दाखेरि अनुहार तथा जिउका अन्य भागका बढि भन्दा बढि मांशपेशीहरु सक्रिय हुन्छन् जुन सरीरलाई स्वस्थ राख्नमा सहयोग बन्दछ ।

हाँसोले शारीरिक र मानसिक तनाव हटाउन मद्दत गर्नुका साथै प्रतिरोधी क्षमता बढाउन पनि सहयोग पुर्याउने योग विज्ञको भनाइ छ ।

हाँसोले तनावका हार्मोनलाई घटाई स्वस्थ रहने रसायन बढाउनुको साथै मुटुको रक्षा गर्न सघाउने तथा दैनिक १० देखि १५ मिनेटसम्म हाँस्नाले तौल घटाउन पनि सहयोग पुग्ने हास्य कलाकार शिवशङ्कर रिजालले बताए । 

उनी दैनिक योग गर्नुका साथै हाँस्ने गर्छन् । “म हाँस्ने योग १५ देखि २० मिनेटसम्म गर्ने गरेको छु । म देखावटी नभई मनदेखि नै हाँस्छु । यसले स्वस्थ पनि बनाउँछ”, हास्य कलाकार रिजालले भने । उनको दिनचर्या नै योग र व्यायाममार्फत सुरू हुन्छ । 

हाँस्दा मष्तिष्कका कोशिकाबाट निस्कने इण्डोर्फिन नामक रसायनले ‘मुड’ ठीक गर्न मद्दत गर्छ । मुड ठीक हुनुको अर्थ हो जीवनका सबै कुरा राम्रो हिसाबले चल्नु । मुड ठीक हुँदा मानिसको व्यक्तिगत, सामाजिक, व्यावसायिक जीवनमा सकारात्मक प्रभाव पर्छ । 

हास्य कलाकार किरण केसीले हास्य विधालाई दर्शकले रोजाइको प्राथमिकतामा राखेको बताए । “हास्य विधामा काम गर्ने कलाकार अहिले सम्पन्न भएका छन् । देशदेखि विदेशसम्म पुगेर आफ्नो प्रस्तुति दिएका छन् ।

यो सबै दर्शकको रोजाइका कारण सम्भव भएको हो”, हास्य कलाकार केसीले भने, “हाम्रो कामले एकैछिन भए पनि मुहार उज्यालो बनाउने काम गर्छ । त्यसैले हाम्रो काम शृङ्खलामा होस् या चलचित्रमा दर्शकले रुचाएका छन् ।”