शेखर कोइरालाका पक्षमा ३१ सांसद छन, ४४ पुगेका दिन संसदीय दलको नेता परिवर्तन हुन्छ: थापा

३० असार, विराटनगर । नेपाली कांग्रेस महामन्त्री गगन थापाले संसदीय दलको नेता परिवर्तनका लागि आफू प्रयासरत रहेको बताएका छन् । अहिले वरिष्ठ नेता शेखर कोइरालाको पक्षमा ३१ सांसद रहेको र यो बढेर आवश्यक संख्या पुगेका दिन संसदीय दलको नेता परिवर्तन हुने उनको भनाइ छ । 

विराटनगरमा शनिबार पत्रकारहरूसँगको कुराकानीमा महामन्त्री थापाले आवश्यक संख्या पुगेका दिन संसदीय दलको नेता परिवर्तन हुने बताएका हुन् । संसदीय दलको नेताका आफू  भिडेको र पार्टीमा विधानअनुसार दलको नेता परिवर्तन भएको इतिहास रहेको बताए । उनले आफूलाई आवश्यक संख्या पुगेको महसुस भएको दिन नेता परिवर्तन गरेर अघि बढने बताए । 

उनलेभने, ‘तनहुँमा उपनिर्वाचन हारेको र मनाङका सांसद टेकबहादुर गुरुङ निलम्बनमा रहेकाले कांग्रेसमा ८७ सांसद छन् । संसदीय दलमा बहुमतका लागि ४४ सांसद आवश्यक पर्छ । बहुमतले दलको नेता हटाउन सकिने व्यवस्था छ । नेता शेखर कोइरालाका पक्षमा कम्तीमा ३१ सांसद छन् । बाँकी सांसदहरुले नेता फेर्नुपर्छ भनेका दिन संसदीय दलको नेता परिवर्तन हुन्छ ।’ 

साउन २ गतेबाट पार्टीको केन्द्रीय कार्यसमितिको सुरू हुने बैठक विधानअनुसार नियमित हुने दाबी गर्दै थापाले बैठकले पार्टीको नीति महाअधिवेशनको मिति तय गर्ने र त्यसपछि व्यापक छलफल गरेर पार्टी अघि बढ्ने बताए । 

उनले नीति महाधिवेशनले पार्टीले गरेको निर्णयहरूको समीक्षा र भावी कार्यदिशा तय गर्ने बताए । पार्टीले चुनाव अगाडि गरेको गठबन्धनले देशको राजनीति गिजोलिएको र पार्टीहरू स्वतन्त्र रूपमा सोच्न पनि नसक्ने अवस्थामा पुगेको थापाको भनाइ थियो । सीमित व्यक्तिको सल्लाह चलेकाले कोशी प्रदेश सरकारमा अप्ठेरो परिस्थिति आएको पनि उनले बताए ।