बिमस्टेक परराष्ट्र मन्त्रीहरुको रिट्रिट बैठकमा सहभागी हुन साउद बैंकक जाँदै

३१ असार, काठमाडौं । बिमस्टेक परराष्ट्र मन्त्रीहरूको रिट्रिट बैठकमा सहभागी हुन परराष्ट्रमन्त्री एनपी साउद आज थाइल्याण्डको बैंकक जाँदैछन् । बिमस्टेक बहु क्षेत्रीय प्राविधिक तथा आर्थिक सहयोगको लागि बंगालको खाडीको प्रयास हो । यसलाई दक्षिण एसियाली क्षेत्रीय सहयोग संगठन (सार्क) को स्थानमा भारतले अघि सारेको क्षेत्रीय संगठनको रुपमा पनि लिइन्छ ।

बिमस्टेक परराष्ट्र मन्त्रीहरूको रिट्रिट सोमबार हुने तय भएको छ । मन्त्री साउदको सचिवालयका अनुसार उनी मंगलबार फर्कने छन् । बिमस्टेकमा भारत, नेपाल, म्यानमार, थाइल्याण्ड, भुटान, श्रीलंका र बंगलादेश सदस्य मुलुक छन् । यसमा सार्कमा रहेका पाकिस्तान, अफगानिस्तान र माल्दिभ्स सामेल छैनन् ।