केन्द्रीय समितिको बैठक पार्टीको आधिकारिक फेसबुक पेजबाट मात्र लाइभ हुन्छः कांग्रेस

२ साउन, काठमाडौं । अन्ततः नेपाली कांग्रेसले केन्द्रीय कार्यसमिति बैठकको प्रत्यक्ष प्रसारण गर्ने भएको छ । बैठकको प्रत्यक्ष प्रसारण कुनै पनि मिडिया हाउसबाट नभई पार्टीको आधिकारिक फेसबुक पेजबाट गरिन लागेको कांग्रेस प्रचार विभाग प्रमुख मीनबहादुर विश्वकर्माले नेपालबहसलाई जानकारी दिएका छन् । उनले प्रत्यक्ष प्रसारणका लागि बैठक हलमा तयारी भइरहेको बताए । 

पार्टी केन्द्रीय कार्यालय सानेपामा आज दिउँसो १ बजेदेखि सुरु हुने बैठकको लाइभका लागि पत्रकार सम्मेलन गर्ने कक्षमा बैठकको लाइभ प्रविधि जडान गरिएको विश्वकर्माले बताए । अहिले सम्मेलन कक्षमा लाइभ गर्ने प्रविधि जोडिएका छ । यहीबाट बैठक हलमा क्यामराको कनेक्सन मिलाएर प्रसारण गरिनेछ । उनले अडिओ, भिडिओ क्पाप्चर पार्टीको अफिसियल क्यामराबाट गराउन प्राविधिक पनि तयारी अवस्थामा रहेको बताए ।