सभापति देउवाले समय नदिएपछि रुपान्तरण अभियानले केन्द्रीय कार्यालयमा बुझायो २१ बुँदे प्रतिवेदन

२ साउन, काठमाडौं । नेपाली कांग्रेसको तेस्रो पुस्ताका नेताहरूले देशव्यापी रुपमा चलाएको पार्टी रुपान्तरण अभियानको प्रतिवेदन पार्टी कार्यालयमा बुझाएका छन् । सभापति शेरबहादुर देउवाले प्रतिवेदन बुझ्ने समय नदिएपछि रुपान्तरण अभियान चलाइरहेका नेताहरूले पार्टी कार्यालयमा प्रतिवेदन बुझाएका हुन् । 

अभियानका नेता भुपेन्द्रजंग शाहीले सभापति शेरबहादुर देउवाले प्रतिवेदन बुझ्नका लागि समय नदिएपछि केन्द्रीय कार्यालयमा प्रतिवेदन बुझाएको बताए । केन्द्रीय समिति बैठक सुरु हुनुअघि प्रतिवेदन बुझाइएको हो । प्रतिवेदन पार्टी महामन्त्री द्वय गगन थापा र विश्वप्रकाश शर्मालाई पनि बुझाइएको छ । 

केन्द्रीय सदस्य मधु आचार्य, गोविन्द पोखरेल र नेताहरू गुरुराज घिमिरे, भुपेन्द्रजंग शाही, रञ्जित कर्णलगायतले रुपान्तरण अभियान चलाएका थिए । कांग्रेस रुपान्तरण अभियानले २१ बुँदे सुझाव दिएको छ । प्रतिवेदनमा १४ औँ महाधिवेशन सकिएको ६ महिनाभित्र गर्ने भनिएको नीति महाधिवेशन यथाशीघ्र गर्न सुझाइएको छ ।

त्यस्तै, रुपान्तरणका लागि हरेक तहका सभापति दुई कार्यकालका लागि सोही पदमा रहन पाउने व्यवस्था जस्तै एक व्यक्ति दुईपटक भन्दा बढी प्रधानमन्त्री हुन नपाउने व्यवस्था गर्न भनिएको छ । उनीहरूले अभियानका क्रममा स्थानीय कार्यकर्ताले राखेको नेतृत्व प्रतिको अपेक्षा र लिनुपर्ने आगामी रणनीतिलाई प्राथमिकता दिएका छन् ।