सुनको विषयलाई लिएर प्रमुख प्रतिपक्षी दल एमालेद्वारा राष्ट्रियसभा बैठक अवरुद्ध

१८ साउन, काठमाडौं । त्रिभुवन अन्तर्राष्ट्रिय विमानस्थलबाट अवैध रूपमा एक क्विन्टलभन्दा बढी सुन भित्रिएकाे भनिएकाे घटनालाई लिएर प्रमुख प्रतिपक्षी दल एमालेले आज बसेकाे राष्टियसभाको बैठक अवरुद्ध पारेकाे छ । 

बरामद भएको सय किलो सुनको छानविनका लागि उच्च स्तरको स्वतन्त्र समिति गठनको माग राख्दै आएको प्रमुख प्रतिपक्षी दल नेकपा एमालेले दिउँसाे १ बजे सुरू भएकाे बैठक अवरुद्ध पारेकाे हाे ।  घटनामाथि छानबिन गर्न संसदीय समिति गठन गर्नुपर्ने एमालेकाे माग छ । 

एमालेले त्रिभुवन अन्तर्राष्ट्रिय विमानस्थलबाट भन्सार छलेर १०० केजी भन्दा बढी तौल सुन भित्र्याइएको घटनामा सरकारकै मिलेमतो रहेको भन्दै छानबिन लागि संसदीय समिति गठन गर्नुपर्ने अडान राख्दै आइरहेको छ ।

एमालेको राष्ट्रियसभा संसदीय दलको नेता देवेन्द्र दाहालले बैठक सुरू भए लगत्तै क्विन्टल सुन तस्करी प्रकरणमा सरकारले उच्चस्तरीय छानबिन समिति गठन नगरेकाले आजकाे संसद बैठक चल्न नदिने जानकारी दिएका छन् । एमालेका सांसदहरू कुर्सीबाट उठेर बैठक चल्न दिएका छैनन् ।

राष्ट्रिय सभाका अध्यक्ष गणेशप्रप्रसाद तिमिल्सिनाले विषयबारे सरकारको ध्यानाकर्षण गराइसकेको र बसेर बैठक चल्न दिने आग्रह गरेपनि अवरुद्ध नै छ ।

एमालेले यही विषयलाई लिएर प्रतिनिधिसभाको बैठक पनि चल्न दिएको छैन । पटक पटक अवरुद्ध भएको प्रतिनिधिसभाको अर्को बैठक यही साउन २२ गते बोलाइएको छ ।