सरकार र ठेकेदारबीच विवाद चुलियो, तत्काल भुक्तानी नभए देशभर आयोजनाको निर्माण कार्य ठप्प पार्ने चेतावनी

१९ साउन, काठमाडौं । सरकार र ठेकेदारबीच भुक्तानी विवादले निर्माण आयोजना प्रभावित बनाउने देखिएको छ । काम गरेको रकम भुक्तानी नभएको भन्दै निर्माण व्यवसायीहरूले आन्दोलन चर्काउँदै लगेका छन् । उनीहरूले देशभर निर्माण कार्य ठप्प पार्ने चेतावनी सरकारलाई दिएका छन् । 

शुक्रबार नेपाल निर्माण व्यवसायीहरूले सरकारले निर्माण व्यवसायीहरूको माग सम्बोधन नभए देशभर निर्माण कार्य ठप्प पार्ने थप चेतावनी दिएका हुन् । उनीहरूले प्रधानमन्त्रीको सरकारी निवास बालुवाटारमा भेला भई निर्माण उपकरणसहित धर्ना दिएका छन् । कार्यक्रममा निर्माण व्यवसायीहरूले पूर्ववर्ती सरकारले गरेका गल्तीहरू सच्याएर देश विकासका लागि सरकार सच्चिन आवश्यक रहेको बताएका छन् । 

विरोध कार्यक्रममा महासंघका अध्यक्ष रवि सिंहले आन्दोलन गर्नु पूर्व धेरै पटक प्रधानमन्त्रीको ध्यानाकर्षण गराए पनि माग सुनुवाइ नभएकाले आन्दोलन गर्न बाध्य भएको भन्दै असार मसान्तसम्म सबै कामको भुक्तानी गर्ने प्रतिबद्धता जनाए पनि सो अनुसार कार्यान्वयन गर्न नसकेको बताए । निर्माण व्यवसायीहरूले बजेट बिनाका आयोजनाहरू खारेज गरी मूल्य समायोजन गर्नुपर्ने, एकमुस्ट म्याद थप गर्नुपर्ने उनको माग छ । 

उनीहरूले बजेट दिन नसक्ने आयोजनाहरू खारेज नगरे देशमा निर्माण व्यवसायीहरूको आन्दोलन थप चर्किने चेतावनी दिएका छन् । कार्यक्रममा निर्माण व्यवसायी एवं नेपाली काँग्रेसका सांसद पूर्णबहादुर तामाङले रक्षा मन्त्रालय नै ठेक्कापट्टामा लागेको भन्दै रक्षा मन्त्रालयले सुरक्षा व्यवस्था चुस्त बनाउने हो की ठेक्कापट्टामा लाग्ने हो भन्दै प्रश्न गरेका छन् ।  

विरोध कार्यक्रममा महासंघका पूर्व अध्यक्ष जयराम लामिछानेले निर्माण व्यवसायीहरू सरकारबाट नै ठगिरहेको आरोप लगाउँदै सरकारको काम निर्माण व्यवसायीहरूले गरेकाले कामको भुक्तानी सबैभन्दा पहिला गर्नुपर्ने बताए । लामिछानेले निर्माण व्यवसायी नेपालको मुहार फेर्ने जमात भएकाले बाटोमा खडा हुने अवस्था बाध्य नबनाउन चेतावनी दिए ।