माओवादी केन्द्रको पदाधिकारी बैठकः केन्द्रीय नेताहरुको जिम्मेवारी तोकियो

२१ साउन, काठमाडौं । नेकपा (माओवादी केन्द्र)को आज बिहान बालुवाटारमा बसेको पदाधिकारी बैठकले पदाधिकारीसहित ४०७ जना केन्द्रीय सदस्यहरूको जिम्मेवारी तोकेको छ । 

बैठकमा अध्यक्ष पुष्पकमल दाहाल ‘प्रचण्ड’ले अघि सारेको कार्यविभाजनसम्बन्धी प्रस्तावलाई बैठकबाट निर्णय गराइएको हो । उक्त प्रस्ताव प्रचण्डले आजै कमलादीस्थित जारी केन्द्रीय समिति (सीसी)को चौथो पूर्ण बैठकमा अनुमोदनका लागि पेस गर्नेछन् । 

सीसी बैठक आजै टुंग्याउने भएको छ । केन्द्रीय सदस्यहरुले बोल्ने क्रम नसकेको भन्दै बैठक केही दिन लम्ब्याउनुपर्ने आवाज बैठकमा उठिरहेका बेला अध्यक्ष प्रचण्डले बोल्न बाँकी केसहरुलाई लिखित कार्यालयमा टिपाउन भनेका छन् । उनले बुधबारदेखि बैठकमा उठेका प्रश्नहरुको जवाफ आज दिएर बैठक समापन गर्दैछन् । बैठक हल आजसम्मका लागि मात्र बुकको गरेको र थप दिन नसक्ने भवन प्रशासनले बताएको भन्दै उनले बैठक तोकिएकै समयभित्र समापन गर्न लागेका हुन् । 

पदाधिकारी बैठकले अध्यक्ष प्रचण्डलाई समग्र पार्टीको जिम्मेवारी दिइएको छ । उपाध्यक्ष महरालाई पार्टी एकता र समाजवादी मोर्चा, उपाध्यक्ष अग्निप्रसाद सापकोटालाई प्रचार प्रसार, उपाध्यक्ष पम्फा भुसाललाई जनवर्गीय संगठन, उपमहासचिवद्वय वर्षमान पुन र जनार्दन शर्मालाई गैरप्रदेश, सचिव देवेन्द्र पौडेल ‘सुनिल’लाई प्रदेश हेर्ने जिम्मा दिइएको छ ।

केन्द्रीय सदस्यको पनि जिम्मा छुट्याइएको बैठक स्रोतले जनायो । जारी सीसी बैठकमा बोल्ने नेताहरुले केन्द्रीय सदस्य नै भूमिका र जिम्मेवारीविहीन हुँदा पार्टी नेतृत्व र पदाधिकारीको वरिपरि घुम्ने अवस्था रहेको भन्दै जिम्मेवारी माग गरेका थिए ।