अर्थमन्त्री महतसँगको भेटमा राजदूत थम्पसनले दिए एमसीसी सम्झौताको शीघ्र कार्यान्वयनमा जोड

२२ साउन, काठमाडौं । अर्थमन्त्री डा. प्रकाशशरण महत र नेपालका लागि अमेरिकी राजदूत डीन थम्पसनबीच सोमबार बिहान भेटवार्ता भएको छ । महत र थम्पसनबीच अर्थमन्त्रालयमा भेटवार्ता भएको हो । 

भेटमा राजदूत थम्पसनले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौता छिट्टो कार्यान्वयन गर्नुपर्नेमा जोड दिएका छन् । जवाफमा डा. महतले नेपाल सम्झौता कार्यान्वयन गर्न सक्दो सहयोग गर्ने पक्षमा रहेको स्पष्ट पारेका थिए । 

थम्पसनले गत बिहीबार प्रधानमन्त्री पुष्पकमल दाहाल ‘प्रचण्ड’लाई भेटेर सम्झौता कार्यान्वयनबारे जानकारी दिएका थिए । एमसीसीले आफ्नो सैन्य कार्यक्रमसँग जोडिएको परियोजनामा नेपाललाई पाँच वर्ष लगाएर प्रसारण लाइन र ग्रामिण सडक निर्माण खर्च गर्नेगरी ५५ अर्ब रुपैयाँ सर्त सहयोग दिने बताउँदै आएको छ ।

त्यसमा नेपालले २५ प्रतिशत योगदान गर्नुपर्ने अनिवार्य सर्त समावेश छ । सम्झौता कार्यान्वयनका लागि एमसीसीबाट नेपालभित्र खडा एमसीसीएको कार्यालयले आतबार मात्र एक सूचना निकालेर आगामी भदौबाट सम्झौता पूर्णरुपमा कार्यान्वयन गर्ने जनाएको थियो । 

यद्यपि सम्झौता नेपाललाई आफ्नो सेना तैनाथ गराउने उद्देश्यले विकास कार्यक्रम अगाडि सारेको भन्दै खारेज हुनुपर्ने माग विभिन्न राजनीतिक दलहरुले गर्दै आइरहेका छन् । विरोधका बाबजु्द प्रमुख राजनीतिक दलहरुले गत फागुनमा सम्झौतालाई एमसीसीकै रुचीअनुसार संसदबाट दुईतिहाईले पारित गरेर कार्यान्वयनको बाटो खोलिसकेको थियो ।