जनमतलाई सरकारमा ल्याउन मन्त्रिपरिषद हेरफेर गर्दै प्रधानमन्त्री, माओवादीका एक मन्त्रीको जागिर जाने

२८ साउन, काठमाडौं । प्रधानमन्त्री प्रचण्डले आज मन्त्रिपरिषद हेरफेर गर्ने तयारी गरेका छन् । समर्थन दिएपनि सरकारमा सहभागी नभइरहेको जनमत पार्टीलाई एक मन्त्री दिएर सरकारमा सहभागी गराउन उनले मन्त्रिपरिषद हेरफेर गर्न लागेका हुन् । यसका लागि माओवादीबाट एक मन्त्रीलाई फिर्ता बोलाई भएको छ ।

प्रचण्डले माओवादीबाट मन्त्री भएका मध्ये कसलाई फिर्ता बोलाउने भन्ने टूंगो भएको छैन । उनले आफ्नो पार्टीका एक मन्त्रीलाई फिर्ता बोलाएर त्यस ठाउँमा जनमतबाट मन्त्री नियुक्ति गर्न लागेको हुन् । कुन मन्त्रीलाई हटाउने हुन् त्यसबारे जानकारी दिइएको छैन । तर एक मन्त्रीलाई फिर्ता बोलाएर जनमतलाई ‘इन्ट्री’ गराउने पक्का भएको माओवादी केन्द्रका नेता नारायण दाहालले बताए । 

माओवादी केन्द्रबाट सामान्य प्रशासनमा अमनलाल मोदी, उर्जामा शक्तिबहादुर बस्नेत, पर्यटनमा सुदन किराँती, गृहमा नारायणकाजी श्रेष्ठ र संचारमा रेखाकुमारी शर्मा मन्त्री छन् । यी मध्ये एकलाई हटाएर जनमतकी अनितादेवी साहलाई नियुक्ति गर्ने भएको हो ।

प्रधानमन्त्री प्रचण्डको नेतृत्वमा २५ सदस्यीय मन्त्रिपरिषद कायम छ । संविधानतः मन्त्रिपरिषदको आकार त्यसभन्दा बढाउन नमिल्ने भएपछि आफ्नै पार्टीका एक मन्त्रीलाई प्रचण्डले जिम्मेवारीबाट मुक्त बनाउन लागेका हुन् । गौर हत्याकाण्ड छानबिनका लागि सरकारले तयारी थालेपछि पछिल्लो समयमा सरकारसँग जसपा चिढिएको बेला तराई केन्द्रित राजनीति गर्दै आइरहेको जनमतलाई सरकारमा सामेल गराउन लागिएको हो ।