दोरम्बा पुगेर प्रधानमन्त्री प्रचण्डले भने- ‘बरु मर्न तयार हुन्छु, शहीदको सपना मर्न दिइन्नँ’

३२ साउन, काठमाडौं । नेकपा (माओवादी केन्द्र)का अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ आज रामेछापको दोरम्बा पुगेका छन् । दोरम्बा हत्याकाण्डका २१ शहीदको २०औं स्मतिमा आयोजित कार्यक्रममा सहभागी हुन दोरम्बाको डाँडाकटेरी पुगेका हुन् । 

उनले त्यहाँ निर्मित शहीदहरुको अर्धकदको शालिकमा खादा र माला लगाएर श्रद्धाञ्जली अर्पण गरेका छन् । उनले श्रद्धाञ्जली सभालाई सम्बोधन गर्दै शहीदहरुको बलिदान र सपना मर्न नदिने, बरु आफू मर्ने तयार हुने बताएका छन् । कार्यक्रम दोरम्बा शैल गाउँपालिका समितिले आयोजना गरेको हो । 

उनीसँगै पार्टीका उपमहासचिव जनार्दन शर्मा, बाग्मती प्रदेशका मुख्यमन्त्री शालिकराम जमकट्टेल पनि पुगेका छन् । उनीहरुले पनि शालिकमा माल्यापर्ण गरेका छन् । प्रचण्ड आजै काठमाडौं फकिँदैछन् ।

तत्कालीन सशस्त्र विद्रोह (जनयुद्ध) चलिरहेको बेला दोस्रो युद्धविरामकै समयमा २०६० साल आजकै दिन दोरम्बामा तत्कालीन नेपाली सेनाले स्थानीयको घरमा जिल्ला र स्थानीय नेताहरु बैठक बसिरहेको बेला जिल्ला जनसरकार प्रमुख डहुका बाबुराम लामा ‘पुष्प’सहित २१ जनालाई निशस्त्र अवस्थामा नियन्त्रणमा लिएर डाँडाकटेरीमा पुर्याइ लाइन लगाएर गोली हानी हत्या गरेका थिए । माओवादीले सोही दिनको स्मरणमा हरेक वर्ष साउन ३२ मा स्मृति दिवस मनाउँदै आइरहेको छ ।

उनी नेतृत्वकै सरकारले केही महिना पहिले मात्र जनयुद्धका क्रममा दोरम्बा हत्याकाण्डसहित सरकार र पार्टी पक्षबाट ज्यान गुमाएका सबैलाई शहीद घोषणा गरिसकेको छ । जनयुद्धकालदेखि पार्टीका नेतृत्वमा रहेका प्रचण्ड हाल पनि नेतृत्वमै छन् ।