सरकारको राम्रो काम देखेर केही मान्छे विक्षिप्त भएका छन् : प्रधानमन्त्री

१० भदौ, काठमाडौं । प्रधानमन्त्री पुष्पकमल दाहाल ‘प्रचण्ड’ले सरकारले गरेको राम्रो कामबाट केही व्यक्तिहरू विछिप्त भएको बताएका छन् । उनले सरकारले गरेका राम्रा कामबाट अत्तालिएका एकथरि मानिसहरु सरकार र गठबन्धनविरुद्ध भ्रामक प्रचारमा लागेको बताए । 

माओवादी केन्द्रनिकट बुद्धिजीवीहरूको संगठन नेपाल बुद्धिजीवी संगठनको तेस्रो पूर्ण बैठकलाई आइतबार सम्बोधन गर्ने क्रममा प्रधानमन्त्रीले यस्तो बताएका हुन् । 

राम्रो काम गरिरहेकै कारण बद्नाम गराउन सुशासन र सभ्य समाज देख्न नचाहने तत्वहरु पछिल्लो समयमा सरकार, माओवादी केन्द्र र गठबन्धनविरुद्ध विषवमन गरिरहेको उनको भनाइ छ । ‘पछिल्लो समय सरकारले गरेको कामबाट एकथरी व्यक्तिहरू आत्तिकएका छन्, विछिप्त भएका छन् ।

उनीहरूले माओवादी पार्टी, सरकार र गठबन्धनविरुद्ध भ्रम छर्दै हिँडेका छन्ड प्रम प्रचण्डले भने, ‘त्यसलाई चिर्न बुद्धिजीवी संगठन अगाडि आउन जरुरी छ ।’ राम्रो कामलाई उल्ट्याएर प्रचार गर्नेहरुलाई सुल्ट्याएर प्रचारमा ल्याएर जवाफ दिन उनले आग्रह गरे ।

सरकार राम्रो काम गर्ने र समाजलाई भ्रष्टाचार र तस्करीमुक्त बनाएर जनतालाइ सुशासन दिने आफ्नो अभियानबाट पछि नहट्ने उनले बताए । प्रचण्ड माओवादी केन्द्रका अध्यक्ष समेत हुन् ।