रुपान्तरण अभियानमा दाेरम्बा शैलुङका माओवादी केन्द्रका नेता कार्यकर्ता जुटे जनश्रममा

२२ भदौ, काठमाडौं । पार्टीको केन्द्रीय अभियान ‘जनतासँग माओवादी विशेष रुपान्तरण अभियान’का क्रममा रामेछापमा माओवादी केन्द्रका नेता–कार्यकर्ता जनतासँगै जनश्रममा जुटेका छन् । उनीहरु अहिले सडक निर्माणकाे सामूहिक काममा खटिएका छन् । 

रामेछाप दोरम्बा शैलुङ गाउँपालिका–७ का वडाअध्यक्ष प्रविण मोक्तान सहित नेता कार्यकर्ता सडक निर्माण तथा स्थानीयलाई काममा सघाउन लागिरहेका छन् । पार्टी केन्द्रको योजना मुताविक विभिन्न टोली बनाएर सडकमा सोलिङ, ड्राइ वाल तथा खाल्डा पुर्ने काममा लागिरहेका छन् । 

बर्खा याममा बाढी र पहिरोले ग्रामीण सडक क्षति पुर्याएपछि सवारी साधन आवतजावतमा समस्या परेपछि सुचारु बनाउने काममा लागेका छन् । दोरम्बा शैलुङ–७ को पाङचेत, थापागाउँ लगायत क्षेत्रमा सडक मर्मतको काम गरिएको छ । उनीहरूले स्थानीयकाे काममा समेत सघाएका छन् ।

तीन महिनासम्म चल्ने अभियानमा पार्टीका नेताहरू जनताका घरदैलोमा पुगेर उनीहरूको दुःख, समस्या र आवश्यकताबारे छलफल चलाइरहेका छन् । 

छलफलमा क्रममा स्थानीयले युद्धकालमा आफूहरूले माओवादी नेता कार्यकर्ता बास, खान र सूचना दिएर सघाएको विषय स्मरण गराएका छन् । शहर पसेपछि माओवादी नेता र कार्यकर्ता विलासी जीवन बिताउन तिर लागेको भन्दै गुनासो गरेका छन् ।

उनीहरूले माओवादी कालमा गाउँघरमा जुवातास, जाँडरक्सी, विकृति निकै कम भएको तर अहिले समाजमा सबैखाले विकृति फैलिएको भन्दै नियन्त्रणका लागी कार्यक्रम ल्याउनुपर्ने बताए । अभियानकर्मीहरुले सरकारले गरेका राम्रा काम र आगामी कार्यक्रमबारे स्थानीयलाई जानकारी गराइरहेका छन् । अब आफूहरु जनतासँगै रहने र जनताको पीर मर्कामा साथ दिने आश्वासन दिएका छन् ।