सुन तस्करी प्रकरणमा हाकिम पक्राउ परेपछि विमानस्थल भन्सारका कर्मचारीको सेवा रोक्ने तयारी

२४ भदौ, काठमाडौं । गत साउन २ मा त्रिभुवन अन्तर्राष्ट्रिय त्रिभुवन विमानस्थलबाट भएको ६० केजी सुन तस्करी प्रकरणमा विमानस्थलका भन्सा अधिकृत र कर्मचारीलाई सीआईबीले धमाधम पक्राउ गर्न थालेपछि भन्सार कार्यालयका कर्मचारीहरू आन्दोलनमा उत्रिएका छन् । 

अनुसन्धानको नाममा प्रहरीले अनावश्यक दुःख दिएको भन्दै उनीहरुले आज त्रिवि भन्सार कार्यालय प्रमुख गौचरलाई पत्र लेख्दै विरोधको चेतावनी दिएका छन् । आज साङ्केतिक विरोधस्वरुप ३ घण्टा पेनडाउन गरेका छन् ।

भदौ २५ र २६ गते कार्गो जाँचपास शाखामार्फत हुने निकासी तथा पैठारीको काम बन्द गर्ने लगायत विषय राखेर विरोधका ५ बुँदे कार्यक्रम घोषणा गरेका छन् । विरोधका कार्यक्रमबारे भन्सार विभाग र अर्थ मन्त्रालयलाई समेत जानकारी दिएका छन् ।

निर्दोष कर्मचारीलाई फसाउन नपाउने, कार्यालयमा निर्भिक र त्रासमुक्त वातावरणमा काम गर्न पाउनुपर्ने, बिना प्रमाण हिरासत थुनामा राखिएका कर्मचारीहरूलाई रिहा गर्नुपर्ने, गिरफ्तार कर्मचारीको वैयक्तिक विवरण सार्वजनिक गर्न बन्द राेक्नुपर्ने, तस्करीका दोषीलाई कारबाही हुनुपर्ने लगायत माग राखेका छन् । 

आफूहरूको माग भदाै २७ गतेभित्र सम्बोधन नभए यात्रु्को जाँचपास काम ठप्प पार्ने चेतावनी दिएका छन् । सुन तस्करी प्रकरणमा अनुसन्धानका लागि भन्दै प्रहरीको सीआइबीले शनिबार मात्र एक भन्सार अधिकृतसहित ३ जना कर्मचारीलाई पक्राउ गरेको थियो । प्रकरणमा हालसम्म कर्मचारी, ७ चिनियाँसहित ३० जना पक्राउ परेका छन् ।