भ्रष्टाचार नियन्त्रणमा सरकारलाई साथ दिन माओवादी केन्द्रको अपिल

११ असोज, काठमाडौं । सरकारको नेतृत्व गरिरहेको नेकपा (माओवादी केन्द्र)ले भ्रष्टाचार नियन्त्रणमा सरकारलाई साथ दिन अपिल गरेको छ । बिहीबार पार्टी केन्द्रीय कार्यालय पेरिसडाँडाँमा बसेको पार्टीको पदाधिकारी बैठकले यस्तो अपिल गरेको हो । 

बैठकपछि सञ्चारकर्मीसँग कुराकानी गर्दै पार्टी प्रवक्ता अग्निप्रसाद सापकोटाले सरकारले जारी राखेको भ्रष्टाचार नियन्त्रण अभियानमा सबैले साथ दिनुपर्ने बताए । उनले जस्तोसुकै कठिन र घेरा हाले पनि सरकारले अभियान नरोक्ने बताए । 

साथै बैठकले देशका विभिन्न भागमा धर्म र जातीय रुप झल्किने गरी देखा परेका गम्भीर प्रकृतिका गतिविधि धार्मिक तथा साम्प्रदायिकता खल्बल्याउने किसिमका अराजकता बढेको निष्कर्ष समेत निकालेको छ । अराजकता रोक्न सबै राजनीतिक दलहरुले पहलकदमी लिनुपर्ने निष्कर्ष निकालिएको उनले बताए । 

प्रवक्ता सापकोटाले बैठकमा आन्दोलनरत राहत शिक्षकसँग सम्वाद गरी समस्याको समाधान गर्नुपर्ने विषयमा गम्भीर रुपमा छलफल भएको जानकारी दिए । 

यसैबीच आजै मात्र माओवादी केन्द्रका अध्यक्ष समेत रहेका प्रधानमन्त्री प्रचण्डले इन्द्रजात्रा पर्वको शुभकामना दिँदै मुलुकमा सामाजिक सद्भाव र धार्मिकि सहष्णिुता कायम गर्नुपर्ने प्रमुख दायित्व सरकारले निर्वाह गरिरहेको बताउँदै राष्ट्रिय र सामाजिक एकताका लागि अपिल गरेका छन् ।