कांग्रेस नेतृत्वमा राष्ट्रिय सरकार बनाउन माओवादी केन्द्रद्वारा अस्वीकार, संसद बैठकमै प्रतिवाद

२६ असोज, काठमाडौं । माओवादी केन्द्रले नेपाली कांग्रेसको नेतृत्वमा ‘राष्ट्रिय सरकार’ गर्ने विषयलाई ठाडो अस्वीकार गरेको छ । शुक्रबार बसेको प्रतिनिधिसभाको बैठकमा नेपाली कांग्रेसका सांसद सञ्जयकुमार गौतमले कांग्रेसको नेतृत्वमा राष्ट्रिय सरकार गठन गरेर मुलुकका विद्यमान समस्या समाधान गर्न र राजनीतिक निकास दिन सकिने धारणा राखेका थिए । 

त्यसपछि बोलेका माओवादी केन्द्रको संसदीय दलका नेता हितराज पाण्डेले गौतमको धारणाको प्रतिवाद गरे । पाण्डेले सरकारको काम कारबाहीको बचाउ समेत गरे । उनले जनता र देशको पक्षमा सशक्त ढंगबाट काम गरिरहेको र थप अगाडि बढ्न सबैले साथ दिनुपर्नेमा जोड दिए । उनले अहिले सरकार परिवर्तनको कुनै आवश्यकता नरहेको र प्रचण्ड नेतृत्वकै सरकारलाई साथ दिएर जानुपर्ने बताए ।

‘सदनमा राष्ट्रिय सरकारको विषय पनि उठेको छ । म भन्न चाहन्छु, हामी देशलाई अगाडि बढाउने कुरा गरिरहेका छौं । फेरि अरू नयाँ नयाँ विषयहरू थप्दै जाने कुरा सान्दर्भिक छैन, त्याे कुरा हाेइन’ पाण्डेले भने ।उनले देशले गति लिइरहेको बेला दृढताका साथ संविधान कार्यान्वयन गर्नुपर्ने बताए । संघीय संसदले समयमै कानुन बनाउन नसक्दा संघीयता कार्यान्वयनमा समस्या भइरहेको उनको भनाइ थियो ।

काेशी प्रदेशमा कांग्रेस नेता डा. शेखर काेइराला पक्षधर ८ प्रदेश सांसदहरूले एमालेकाे साथ लिएर मुख्यमन्त्री नियुक्तिकाे प्रक्रियामा अगाडि बढिरहेकाे सन्दर्भमा संघीय सरकारका मुख्य २ दलका  सांसदबाट यस्ताे धारणा बाहिरिएकाे हाे । 

पछिल्लाे समयमा माओवादी केन्द्रका अध्यक्ष समेत रहेका प्रधानमन्त्री प्रचण्डले पहिचानकाे कुरा उठाएपछि कांग्रेसका सांसदहरूले सरकार परिवर्तनकाे कुरा बाहिर ल्याउन थालेका छन् ।