जसपा समाजवादी लोकतान्त्रिक पार्टी हो, कम्युनिस्ट होइन : उपेन्द्र यादव

३० असोज, काठमाडौं । जनता समाजवादी पार्टी (जसपा)का अध्यक्ष उपेन्द्र यादवले आफ्नो पार्टी कम्युनिस्ट हुन नसक्ने बताएका छन् । मंगलबार सामाजिक संजाल फेसबुक पेजमा लामो स्टाटस लेख्दै जसपा कम्युनिष्ट वा साम्यवादी हुन नसक्ने भन्दै भ्रममा नपर्न स्पष्ट पारेका छन् । 

साथै उनले जसपासहित ४ दल सम्मिलित समाजवादी मोर्चा लोकतान्त्रिक समाजवादी र कम्युनिष्टबीचको मोर्चा भएको धारणा सार्वजनिक गरेका छन् । उनले समाजमा रहेको गरिबी, अशिक्षा, बेरोजगारी, सामाजिक, आर्थिक शोषण, उत्पीडनका साथै वर्गीय, जातीय र लिङ्गका आधारमा कायम रहेका असमानता र विभेद उन्मुलनका लागि लोकतान्त्रिक पार्टी र कम्युनिष्टबीच एकता र सहकार्य हुन सक्ने बताएका छन् । उनले लेखेका छन्, ‘एउटा समाजवादी पार्टीको लोकतान्त्रिक पार्टी र कम्युनिस्ट पार्टीहरुबीच सहकार्य र मोर्चा मात्र हुन सक्छ ।’

अध्यक्ष यादवले आफू पहिचानसहितको संघीयता, सुशासन, समानता, स्वतन्त्रता, सामाजिक आर्थिक न्याय र समाजवादप्रति आस्था राख्ने व्यक्ति भएकोले कम्युनिस्ट वा साम्यवादी हुन नसक्ने प्रष्ट पार्दै कम्युनिष्ट भएको भ्रम नराख्न पनि अपिल गरेका छन् । समाजवादी मोर्चाभित्रैका कतिपय नेताहरुले मोर्चालाई समाइवादी मोर्चा संज्ञा दिइरहेका बेला मोर्चाका एक घटक जसपाका अध्यक्ष यादवले मोर्चामा कम्युनिष्ट समेत आवद्ध रहेको बताएका हुन् । 

गत असारमा गठित मोर्चामा जसपा, माओवादी केन्द्र, एकीकृत समाजवादी र संसदीय प्रणालीबाहिर रहेको विप्लव नेतृत्वको नेकपा आवद्ध छन् । मोर्चाले सात वटै प्रदेशमा सन्देशसभा सम्पन्न गरिसकेकाे छ ।