विश्व बैंकबाट नेपालले लियो करिव १४ अर्ब सहुलियतपूर्ण ऋण, गुणस्तरीय स्वास्थ्य सेवामा खर्चिने

१६ कात्तिक, काठमाडौं । नेपाल सरकारले स्वास्थ्य क्षेत्रको सुधारका लागि भन्दै विश्व बैंकबाट करिव  १४ अर्ब सहुलियतपूर्ण ऋण लिने सम्झौता गरेको छ ।  जस्मा १० करोड डलर (झण्डै १३ अर्ब ३० करोड रुपैयाँ) सहुलीयतपूर्ण ऋण हो भने ३८ लाख ४० हजार (झण्डै ५१ करोड रुपैयाँ) अनुदान हो । 

अर्थ मन्त्रालय र विश्व बैंकले संयुक्त रुपमा जारी गरेको विज्ञप्तिमा यो ऋण अन्तर्राष्ट्रिय विकास संस्था (आईडीए)मार्फत प्राप्त हुने जनाइएको छ ।  अनुदान स्वास्थ्य आपतकालीन पूर्वतयारी तथा प्रतिकार्य कोष (एचईपीआरटीएफ)बाट प्राप्त हुने विश्व बैंकले जनाएको छ । 

दुवै सहायतामा बिहीबार विद्युतीय हस्ताक्षर भएको र यो नेपालमा विश्व बैंकद्वारा वित्तीय लगानी गरिएको यो पहिलो विद्युतीय हस्ताक्षरित आयोजना भएको समेत विश्व बैंकले जनाएको छ । सम्झौतामा नेपाल सरकारको तर्फबाट अर्थसचिव डा. कृष्णहरि पुष्कर र माल्दिभ्स, नेपाल र श्रीलंकाका लागि विश्व बैंकका राष्ट्रिय निर्देशक फारिस हदाद जेर्भोसले हस्ताक्षर गरेका छन् ।

अर्थ मन्त्रालयका अनुसार यो कार्यक्रम संघीय तहको स्वास्थ्य बीमा बोर्ड, कोशी र गण्डकी प्रदेशका छनोट गरिएका प्रदेश र स्थानीय तहको समन्वयमा स्वास्थ्य तथा जनसंख्या मन्त्रालयले कार्यानवयन गर्नेछ । यस कार्यक्रमले गुणस्तरीय स्वास्थ्य सेवा प्रवाह गर्न स्वास्थ्य प्रणालीको तत्परतामा सुधार, स्वास्थ्य बीमाको पहुँच अभिवृद्धि र छनोट गरिएका प्रदेश तथा स्थानीय तहमा स्वास्थ्य आपतकालीन पूर्वतयारी एवम् प्रतिकार्य क्षमता सुदृढीकरणमा खर्च हुनेछ ।