भारतमा जारी भ्वाइस अफ ग्लोबल साउथ समिटमा प्रधानमन्त्री प्रचण्डले आज साँझ सम्बोधन गर्ने

१ मंसिर, काठमाडौं । प्रधानमन्त्री पुष्पकमल दाहाल प्रचण्डले भारतमा आजदेखि सुरु भएको भ्वाइस अफ ग्लोबल साउथ समिटमा आज साँझ सम्बोधन गर्ने भएका छन् । भारतले आयोजना गरेको यो दोस्रो समिट हो । समिटमा आज बेलुका प्रधानमन्त्री प्रचण्डको सम्बोधन रहेको उनको सचिवालयले जानकारी दिएको छ । 

भर्चुअल रूपमा हुने समिटको उद्घाटन गर्दै भारतीय प्रधानमन्त्री नरेन्द्र मोदीले सम्बोधन गरेका छन् । आज विभिन्न देशका प्रमुखले सम्बोधन गर्ने कार्यक्रम रहेको छ । साँझ नेपालका प्रधानमन्त्री पुष्पकमल दाहाल ‘प्रचण्ड’ले सम्बोधन गर्ने कार्यक्रम रहेको छ ।
 
यो समिटमार्फत विभिन्न दलका प्रमुखहरूले आ–आफ्ना विचार तथा प्राथमिकता एक अर्कासँग साटासाट गर्नेछन् । अघिल्लो समिटमा ग्लोबल साउथका १२५ राष्ट्रहरूको भर्चुअल उपस्थिति थियो । यो समिटमा शनिवार विदेशी मन्त्रीहरूको सम्बोधन हुन्छ भने कात्तिक ३ गते अर्थमन्त्रीहरूले सम्बोधन गर्ने कार्यक्रम राखिएको छ । साथै कार्यक्रममा शिक्षामन्त्री, स्वास्थ्यमन्त्री, उद्योगमन्त्री, ऊर्जा मन्त्रीहरूको पनि सम्बोधन रहने बताइएको छ ।