नेपाल आयल निगमले तिर्यो सबै बक्यौता, अब ऋणमुक्त

१२ मंसिर, काठमाडौं । नेपाल आयल निगम आज मंगलबारबाट ऋण मुक्त भएको छ । झण्डै तीन वर्षदेखि ऋणमा रहेको नेपाल आयल निगम मंगलबारदेखि ऋणमुक्त बनेको हो । निगमले इन्धनको आपूर्ति सहज बनाउन सरकारबाट लिएको ७ अर्ब ऋणमध्ये अन्तिम किस्ता ७० करोड अर्थ मन्त्रालय अन्तर्गतको सार्वजनिक ऋण व्यवस्थापन कार्यालयमा भुक्तानी गरको जनाएको छ । 

कच्चा र प्रशोधित तेलको मूल्य बढ्दा निगम २०७७ पुसदेखि नोक्सानीमा जान थालेको थियो । मूल्य बढ्दै जाँदा एकै वर्षमा निगम करिब ५० अर्ब घाटा बेहोरेको थियो । त्यसयता भारतीय आगल निगमबाट इन्धन खरिद गर्दा समेत करिब ३३ अर्ब वक्यौता रहेको थियो । वाणिज्य बैंकसँग ३ अर्ब र सरकारसँग ७ अर्ब ऋण लिएकोमा मंगलबार ब्याजसहित सबै चुक्ता गरेको निगमले जनाएको छ ।