हाम्रो मिसन ०८४ हैन, सुशासन हुनुपर्छ : उपसभापति गुरुङ

२४ मंसिर, काठमाडौं । नेपाली कांग्रेसका उपसभापति धनराज गुरुङले कांग्रेसको मिसन सुशासन हुनुपर्ने बताएका छन् । पार्टीहरुले निर्वाचनलाई मिसन बनाउँदा देश बिग्रिएको उनको भनाइ छ । आइतबार सानेपामा पार्टीको मुखपत्र ‘नेपाल पुकार’को विमोचन कार्यक्रममा उनले निर्वाचनलाई मिसन बनाउँदा देश बिग्रिएको बताए ।
 
‘मिसन ०८४ कता–कता सुन्छु, चुनाव जिताइदिऔँ भन्ने मिसनले देश बिग्रेको छ । कांग्रेसको मिसन सुशासन हुनुपर्छ । पार्टीका नेता एकअर्काप्रति गाली गलौजमा उत्रने गरेका छन् । यो गलत भयो । एउटा पार्टीको नेताले अर्को पार्टीको नेतालाई गाली गर्न बाहेक केही सिकेनौँ । तर, राजनीतिक दलको साझा शत्रु गरिबी, रोग, भोक, भ्रष्टाचार हो भन्न सकेनौँ, उनले भने ।

कानुन न्याय तथा संसदीय मामिला मन्त्री समेत रहका गुरुङले भ्रष्टाचारको फाइल खोल्दा खोल्दै हात गलिसकेको बताए । ‘भ्रष्टाचारको फाइल खोल्दै गयो, अर्को आउँछ । फोहोरको डंगुर रहेछ, खोल्दै जाँदा हात गलिसक्यो । अब पार्टी नयाँ ढंगले नजाने हो भने समस्या टाढा नभएको उनको भनाइ थियो ।