तीन घण्टापछि खुल्यो अवरुद्ध बीपी राजमार्ग

९ पुस, सिन्धुली । तीन घण्टापछि बीपी राज मार्ग खुलेको छ । बस र मोटरसाइकल एकआपसमा ठक्कर खाई भएको दुर्घटनामा परी मोटरसाइकलमा सवार दुई जनाको मृत्युपछि आक्रोशित स्थानीय तथा यात्रुले बसमा आगजनी गरेर अवरोध भएको बीपी राजमार्ग प्रहरीले खुलाएको हो । 

प्रहरीका अनुसार बीपी राजमार्ग अन्तर्गत सुनकोसी गाउँपालिका–३ बोहोरेटारमा सोमबार बिहान बस र मोटरसाइकल एकआपसमा ठक्किँदा मोटरसाइकल चालक खोटाङ तुवाचुङ नपा–२ का २० वर्षीय सुशन राई र पछाडि सवार खोटाङ दिक्तेल नगरपालिका–१० की १८ वर्षीया मुनाकला राईको मृत्यु भएको थियो । 

बस चालक रुपेश अधिकारीलाई नियन्त्रणमा लिएर दुर्घटनाबारे आवश्यक अनुसन्धान भइरहेको प्रहरलिे जनाएको छ । प्रमाण सहित पेस भएमा बसमा आगजनी गर्नेलाई समेत कानुनी कारबाहीको दायरामा ल्याउने तयारी प्रहरीले गरेको छ । बसमा आगजनी गरेपछि करिब तीन घण्टा बीपी राजमार्ग अवरुद्ध थियो ।