हामीले मिलेर भ्रष्टाचारको अन्त्य नगरेसम्म जनतालाई विकास र सुशासन दिन सकिँदैनः अध्यक्ष नेपाल

१६ पुस, काठमाडौं । नेकपा एकीकृत समाजवादीका अध्यक्ष एवम् पूर्वप्रधानमन्त्री माधवकुमार नेपालले भ्रष्टाचार व्याप्त रहेसम्म कुनै पनि व्यवस्थाले जनताको आकांक्षा पूरा गर्न नसक्ने बताएका छन् । उनले अहिले जनताले छिटो–छिटो गतिमा भ्रष्टाचारको अन्त्य र सुशासन चाहेको बताए ।

राष्ट्रिय मेलमिलाप दिवसको सन्दर्भमा सोमबार काठमाडौंमा नेपाली कांग्रेसले गरेको कार्यक्रममा अध्यक्ष नेपालले भने, ‘भ्रष्टाचार रहेसम्म कुनै पनि व्यवस्थाले जनतालाई विकास र संमृद्धि दिन सक्दैन । त्यसकारण भ्रष्टाचारको अन्त्य र सुशासन कायम गर्न सक्ने हो भने हामीले अहिले ल्याएको व्यवस्था नै दुनियाँकै सबैभन्दा उत्तम हो ।’

पछिल्लो समय एकथरीहरूले राजतन्त्रको वकालत गरिरहेको र अर्कोथरीले कार्यकारी राष्ट्रपतिको कुरा गरिरहेको भन्दै अध्यक्ष नेपालले संमृद्ध संसदीय प्रणालीभन्दा राम्रो अर्को व्यवस्था दुनियाँमा कहीँ पनि नदेखेको बताए । उनले अहिले दलहरूबीच आपसी समन्वय र मेलमिलाप गरेर नै देशलाई विकास र संमृद्धिको बाटोमा अघि बढाउनुपर्ने बेला रहेको बताए ।
 

‘हामी साँच्चै देशको विकास गर्न चाहान्छौँ भने बोली एउटा, व्यवहार अर्को हुनुभएन । हामीले इमान्दार भएर काम गर्ने हो भने संसदीय प्रणाली नै सर्वोत्तम व्यवस्था हो,’ उनले भने, ‘संसदीय प्रणालीको विकल्प संमृद्ध संसदीय प्रणाली हुनसक्छ, तर अरू कुनै व्यवस्था यसको राम्रो विकल्प हुनै सक्दैन । यो संसारभरिका देशहरूलाई उदाहरणका लागि हेरेर पनि प्रष्ट हुन सकिन्छ ।’