गठबन्धनले राष्ट्रियसभाका २० सीटमा कसरी गर्छ एमालेसँग सहमति

१८ पुष, काठमाडौं । राष्ट्रियसभा सदस्यको निर्वाचन र सीट भागबण्डका विषयमा छलफल गर्न सत्ता गठबन्धनको बैठक बालुवाटारमा सुरु भएको छ । माघ ११ गते हुने राष्ट्रियसभाको सीट भागबन्डाबारे छलफल गर्नको लागि बैठक बसेको हो ।

बैठकमा कांग्रेस माओवादी केन्द्र, नेकपा एस र जसपा नेताहरु सहभागी छन् । हिजो र आज बसेको कांग्रेस र माओवादीबीचको बैठकमा गठबन्धनका अन्य दलसँग पनि छलफल गरेर सीटको भागबण्डा टुंग्याउने सहमति बनेको छ । गठबन्धनमा रहेका साना दलमा पनि सीट भागबण्डा गर्नुपर्नेछ । 

यस लगत्तै नेकपा एमालेसँग गठबन्धन दलका नेताहरुको बैठक राखिएको छ । एमालेलाई पनि सीट दिने विषयमा छलफल हुनु लागेको हो । कांग्रेस र माओवादीबीच राष्ट्रिय सभामा एमालेलाई पनि समेट्ने सहमति बनेको छ । यसैले यो बैठकलगत्तै गठबन्धन र एमालेको बैठक बस्ने तय भएको छ ।