गठबन्धनका शीर्ष नेताबीच राष्ट्रियसभा निर्वाचन र टीआरसी विधेयकबारे बालुवाटारमा छलफल

२९ पुस, काठमाडौं । सत्ता गठबन्धनको बैठक प्रधानमन्त्री निवास बालुवाटारमा बसेको छ । बैठकमा आगामी माघ ११ गते हुने राष्ट्रियसभा निर्वाचन र द्वन्द्वकालीन घटनाका सम्बन्धमा छलफल भएको छ । बैठकमा गठबन्धनका शीर्ष नेता सभागि थिए । संक्रमणकालीन न्याय (टीआरसी) सम्बन्धी विधेयकमा सहमति खोज्न सत्ता गठबन्धनको बैठक बसेको हो । 

प्रधानमन्त्री पुष्पकमल दाहाल प्रचण्डले संसदमा पुगेर अल्झिएको विधेयकमा सत्तारुढ दलभित्रबाटै सहमति खोजेर अघि बढ्न गठबन्धनको बैठक बोलाएका हुन् । बैठकमा सहभागी हुन नेताहरू प्रधानमन्त्रीको सरकारी निवास बालुवाटारमा पुगेका हुन् । प्रधानमन्त्री प्रचण्डका स्वकीय सचिव रमेश मल्लले बैठकमा राष्ट्रियसभा निर्वाचनको तयारी र संक्रमणकालीन न्यायसम्बन्धी विधेयकका विषयमा छलफल भएको जानकारी दिए । 

गत वर्ष नै सरकारले संसदमा दर्ता गराएको विधेयक पास गर्न प्रधानमन्त्री दाहाललाई दबाब छ । एमालेलाई समेत मनाएर सर्व सहमतिमा विधेयक पास गर्ने दाहालको चाहना असफल जस्तै बनिसकेको छ भने अब सत्तारुढ गठबन्धनले बहुमतबाट विधेयक पास गरेर अघि बढ्ने तयारी छ । कानुन, न्याय तथा संसदीय मामिला मन्त्री धनराज गुरुङले यसअघि नै आगामी अधिवेशनबाट सो विधेयक पारित हुने बताइसकेका छन् ।