सरकारले मधेसका माग पूरा गर्न चासो नदेखाएको राजपाको आरोप

काठमाडौं । राष्ट्रिय जनता पार्टी (राजपा)का शिर्ष नेताहरुले सरकारले मधेसका माग पूरा गर्न चासो नदेखाएको आरोप लगाएका छन् ।

पार्टी स्थापनाको तेस्रो वार्षिकोत्सवका अवसरमा शनिबार काठमाडौमा आयोजित कार्यक्रममा उनीहरुले मधेसका मागप्रति बेवास्ता गर्ने सरकारको कार्यशैली निराशाजनक रहेको टिप्पणी पनि गरे ।

कार्यक्रममा कार्यक्रममा अध्यक्ष मन्डलका संयोजक शरतसिंह भण्डारीले सरकारले मधेसका माग पूरा गर्न ढिलाई गरेको भन्दै आपत्ती जनाए । राजपा नेता राजेन्द्र महतोले कुनैपनि हालतमा पार्टीको महाधिवेशन गर्नुपर्ने बताउँदै छिट्टै पदाधिकारी बैठकबाट महाधिवेशनको टुंगो लाग्ने बताए ।

राजपाका अर्का नेता अनिल झाले पार्टीभित्र कुनै विवाद नभएको बताउँदै केही पदाधिकारीहरुबीच भएको असमझदारी वार्तामार्फत् समाधान गरिने धारणा राखे ।

२०७४ साल वैशाख ७ गते मधेसकेन्द्रित विभिन्न ६ पार्टी मिलेर बनेको राजपाले शनिबार काठमाडौंमा वार्षिकोत्सवका अवसरमा एक कार्यक्रमको आयोजना गरेको हो । कार्यक्रममा काग्रेस सभापति शेर वहादुर देउवा,परराष्ट्रमन्त्री प्रदीप ज्ञवाली लगाएत अन्य दलका नेताहरु पनि सहभागी भएका थिए ।