महामन्त्री थापाको प्रतिवेदन विवादमा आएपछि देउवाले बुढानिलकण्ठमा बोलाए आकस्मिक पदाधिकारी बैठक

७ फागुन, काठमाडौं । नेपाली कांग्रेसका महामन्त्री गगन थापाको सांगठनिक प्रतिवेदन विवादमा आएपछि यसबारे छलफल सभापति शेरबहादुर देउवाले पदाधिकारी र पूर्वपदाधिकारी बैठक बोलाएका छन् । देउवाले बुढानिलकण्ठस्थित निवासमा उपस्थित हुने पदाधिकारी र पूर्वपदाधिकारीलाई बोलाएको बताइएको छ । 

गोदावरीमा आजदेखि सुरु भएको महासमिति बैठकमा उद्घाटन सकिएपछि बूढानीलकण्ठ निवासमा बैठक डाकेका हुन् । महामन्त्री गगन थापाले महासमितिमा पेस गर्न तयार पारेको प्रतिवेदनमा ०८२ भित्र महाधिवेदन र आगामी दिनमा चुनावी गठबन्धन नगर्ने भन्ने विषय विवादमा छ । 

यसलाई हटाउने विषयमा छलफलका लागि देउवाले बैठक बोलाएका छन् । गत फागुन ३ गते केन्द्रीय समिति बैठकमा पेस गरेको प्रस्तावबाट त्यो विषय हटाउन दवाव सुरु गरेका देउवाले महामन्त्री थापासँग धेरैपटक छलफल गरिसकेका छन् । महामन्त्री थापाले भने चुनावी गठबन्धन नगर्ने विषय पार्टी हित विपरीत भए महासमिति बैठकबाटै खारेज गरिदिन चुनौती गरिरहेका छन् ।