गठबन्धन फुट्ने आस नगर्नु, दायाँबायाँ हुँदैनः देउवा

१८ फागुन, काठमाडौं । नेपाली कांग्रेसका सभापति शेरबहादुर देउवाले विपक्षी दललाई सत्ता गठबन्धन फुट्छ र अवसर पाउँला भनेर आसा नगर्न आग्रह गरेका छन् । राष्ट्रिय सभा अध्यक्ष त यो भन्दा जटिल विषय आएपनि सत्ता गठबन्धन दायाँबायाँ नहुने बताएका छन् । 

भरतपुर भ्रमण वर्षमा सहभागी हुन शुक्रवार चितवन पुगेका पूर्वप्रधानमन्त्री समेत रहेका सभापति देउवाले राष्ट्रियसभा अध्यक्ष पदको विषयलाई लिएर गठबन्धनमा कुनै दवाव नपर्ने बताए । फागुन २९ गते हुने राष्ट्रियसभा अध्यक्षको निर्वाचनमा सत्ता गठबन्धनमा रहेका कांग्रेस र माओवादी केन्द्र दुवैले उम्मेदवारी दिने बताइरहेका बेला देउवाले गठबन्धन फुट्छ भनेर आस नगर्न भनेका हुन् । 

अहिले सत्ता गठबन्धन फेरबदल हुने आशका भइरहेका बेला देउवाले गठबन्धनमा त्यसले कुनै फरक नपार्ने प्रस्टीकरण दिएका छन् । भरतपुर विमानस्थलमा प्रधानमन्त्री प्रचण्डको अभिव्यक्तिलाई लिएर सञ्चारकर्मीले गठबन्धनबारे गरेको प्रश्नमा देउवाले भने, ‘गठबन्धन केही पनि हुँदैन । कति भन्नु भनिसकेँ त मैले ?’ 

सभापति देउवाले गठबन्धन निरन्तर जाने र त्यसमा ढुक्क हुन आग्रह गरे । उनले कसैले गठबन्धन फुट्ला र त्यसको लाभ लिउँला भनेर बसेको भए त्यो मिथ्या हुने बताए । ‘गठबन्धन निरन्तर जान्छ । फट्ने आस नगर्नू, ढुक्क भए हुन्छ’, देउवाको जवाफ छ । उनले राष्ट्रियसभा अध्यक्षबारे सरसल्लाह भैनसकेको भन्दै छलफल गरेर टुंगो पुग्ने बताए ।