मन्त्रालय भागबन्डा मिलाउन नयाँ गठबन्धनकाे बैठक बालुवाटार सुरु

२२ फागुन, काठमाडौं । नयाँ गठबन्धन बनेपछि मन्त्रालय भागबन्डा मिलाउन बालुवाटार दलहरू छलफलमा जुटेका छन् । प्रधानमन्त्री पुष्पकमल दाहाल 'प्रचण्ड'को सरकारी निवास बालुवाटारमा अहिले केहिबेर अघिदेखि गठबन्धन दलहरूको बैठक सुरु भएको हो ।

बैठकमा प्रधानमन्त्री प्रचण्ड‚ नेकपा 'एमाले'का अध्यक्ष केपी शर्मा ओली‚ राष्ट्रिय स्वतन्त्र पार्टी 'रास्वपा'का सभापति रवि लामिछाने र जनता समाजवादी पार्टी 'जसपा'का अध्यक्ष उपेन्द्र यादव छन् । उनीहरू बाहेक दोस्रो तहका नेताहरू सहभागी छन् । मन्त्रालयमा दलहरूको आ-आफ्नै दाबी छ ।

एमाले, माओवादी र रास्वपा एक वर्षपछि एक ठाउँमा भएका छन् भने कांग्रेस सरकारबाट बाहिरिएको छ । अघिल्लो वर्ष १० पुसमा बनेको गठबन्धन भत्किएपछि २५ फागुनको राष्ट्रपति निर्वाचनसँगै कांग्रेस र माओवादीबीच नयाँ गठबन्धन बनेको थियो ।

पुरानो गठबन्धन भत्किएर नयाँ सत्ता समीकरण बनेसँगै प्रधानमन्त्री प्रचण्डले सोमबार पुराना सबै मन्त्रीलाई हटाई चार सदस्यीय नयाँ मन्त्रिपरिषद् गठन गरेका छन् । सोमबार नै एमालेका पदम गिरी, माओवादीका हितबहादुर तामाङ र रास्वपाका डीपी अर्याल विनाविभागीय मन्त्री बनेका छन् ।