राप्रपा नेता विक्रम पाण्डे र ठाकुरमोहन श्रेष्ठबीच भनाभन, बैठकबाट बाहिर निस्केपछि आक्रमण

२७ फागुन, काठमाडौं । राप्रपाका नेता तथा कार्यसम्पादन समिति सदस्य ठाकुरमोहन श्रेष्ठमाथि पार्टी कार्यालयमा आक्रमण भएको छ । पार्टीको केन्द्रीय कार्यसम्पादन समितिको बैठक हलबाट बाहिर निस्कँदै गर्दा श्रेष्ठमाथि आइतबार बिहान आक्रमण भएको हो । उनलाई खास चोट पटक भने नलागेको बताइएको छ । 

नेता दीपकबहादुर सिंहका अनुसार बैठक चलिरहेका बेला नेता तथा पूर्वमन्त्री विक्रम पाण्डेसँग उनको भ्रष्टाचारका विषयमा विवाद भएको थियो । केहिबेर उनीहरुबीच भनाभन चलेको थियो । कार्यसम्पादन समितिको बैठकमा छलफलका क्रममा नेता विक्रम पाण्डेमाथि विभिन्न प्रश्न उठेको भन्दै आलोचना भएको थियो । सोही क्रममा श्रेष्ठले पाण्डेलाई भ्रष्टाचारमा संलग्न रहेको भन्दै पार्टी बचाउमा लाग्नुपरेको बताएका थिए । 

त्यसपछि आक्रोशित हुँदै पाण्डे बैठकस्थलबाट बाहिरिएका थिए । त्यसलगत्तै श्रेष्ठमाथि आक्रमण भएको हो । सिंहका अनुसार आक्रमण गर्नेहरू पार्टीभन्दा बाहिरका मानिस रहेका छन् । आक्रमणपछि उनीहरू फरार रहेका छन् । आक्रमणकारीलाई खोजी गर्न प्रहरीलाई जानकारी गराइएको छ ।  

कार्यसम्पादन समितिको बैठक लम्बिने भएपछि साढे ११ बजेतिर लन्च ब्रेक भएको थियो । नेताहरू खाना खान बाहिर निस्कने क्रममा एक्कासि पूर्व एआइजी समेत रहेका श्रेष्ठमाथि आक्रमण भएको थियो । केहि बपार्टी कार्यालयमा होहल्ला पनि भएको थियो ।