राष्ट्रिय सभाले फागुन २९ गतेलाई तोक्यो अध्यक्षको चुनाव

२७ फागुन, काठमाडौं ।  आइतबार बसेको राष्ट्रिय सभाको बैठकले राष्ट्रिय सभा अध्यक्ष पदका लागि फागुन २९ गते चुनाव हुने जनाएको छ । राष्ट्रिय सभाकी उपाध्यक्ष उर्मिला अर्यालले फागुन २९ गते मंगलबार चुनाव तोकिएको बैठकमा जानकारी गराएकी छन् । 

राष्ट्रिय सभा अध्यक्ष पदका लागि हुने निर्वाचनको सूचना प्रकाशन गर्न उपाध्यक्ष अर्यालले संघीय संसदका महासचिव पदमप्रसाद पाण्डेयलाई निर्देशन दिएकी छन् । यसअघि नेपाली कांग्रेस राष्ट्रिय सभा संसदीय दल नेता कृष्णप्रसाद सिटौलाले केही दिन चुनाव सार्न आग्रह गरेका थिए । 

आइतबारको सर्वदलीय बैठकमा कांग्रेसले राष्ट्रिय सभा अध्यक्षको चुनाव सार्न आग्रह गरे पनि फागुन २९ गतेलाई नै चुनाव मिति तोकिएको हो । राष्ट्रिय सभामा १७ सांसदसहित नेकपा माओवादी केन्द्र सबैभन्दा ठूलो दल छ ।

कांग्रेसका १६, एमालेका १०, एकीकृत समाजवादीका ८, जसपाका ३, लोसपा र राष्ट्रिय जनमोर्चाका एक–एक सांसद छन्। सरकारको सिफारिसमा राष्ट्रपतिबाट मनोनीत हुने एक रिक्त छ । सत्ता गठबन्धनबीच राष्ट्रिय सभा अध्यक्षमा माओवादीले र उपाध्यक्षमा एमालेले उम्मेदवारी दिने समझदारी बनेको छ ।