राष्ट्रिय सभामा शाक्य र महालेखा परीक्षकमा राया नियुक्त

६ वैशाख, काठमाडौं । राष्ट्रपति रामचन्द्र पौडेलले महालेखा परीक्षकमा तोयम राया र राष्ट्रिय सभा सदस्यमा डा.अन्जान शाक्यलाई मनोनीत गरेका छन् । राष्ट्रपति पौडेलले बिहीबार रायालाई महालेखा परीक्षक पदमा नियुक्त गरेका हुन् । 

राष्ट्रपति पौडेलले संवैधानिक परिषदको सिफारिसमा नेपालको संविधानको धारा २४० को उपधारा (२) बमोजिम पदमा नियुक्त गरेको विज्ञप्तिमार्फत् राष्ट्रपति कार्यालयका प्रवक्ता शैलजा रेग्मी भट्टराईले जानकारी दिएका छन् ।

यस्तै डा. अन्जान शाक्य राष्ट्रिय सभा सदस्यमा मनोनीत भएकी छन् । राष्ट्रपति पौडेलले नेपालको संविधानको धारा ८६ को उपधारा (२) को खण्ड (ख) बमोजिम नेपाल सरकारको सिफारिसमा उनलाई नियुक्त गरेको राष्ट्रपति कार्यालयले जनाएको छ । 
 
शाक्यलाई २०७९ चैत ३० गते बसेको मन्त्रिपरिषद् बैठकले मनोनयनका लागि राष्ट्रपति समक्ष सिफारिस गर्ने निर्णय गरेको थियो ।