प्रदेश प्रमुखबाट संविधान मिच्ने काम भयोः कांग्रेस

६ वैशाख, काठमाडौं । नेपाली कांग्रेसले प्रदेशका प्रमुखहरूले संविधान मिचेर असंवैधानिक काम गरिरहेको निष्कर्ष निकालेको छ । बुढानिलकण्ठ निवासमा कांग्रेसका नेताहरुलाई बोलाएर सभापति शेरबहादुर देउवाले प्रदेश प्रमुखहरूले संविधानको बर्खिलाप काम गरिरहेको भन्दै संविधानको रक्षाका लागि कांग्रेस चुप बस्न नमिल्ने बताएका छन् । 

नेकपा एकीकृत समाजावदीका अध्यक्ष माधवकुमार नेपालसँगको भेटबारे जानकारी दिन देउवाले नेताहरुलाई बुढानिलकण्ठमा बोलाएका थिए । प्रदेश असंवैधानिक ढंगबाट अगाडि बढेकाले त्यसका विरुद्ध नेताहरु लाग्नुपर्ने देउवाको भनाइ छ । सत्ता गठबन्धनमा असन्तुष्टि नेपालसँगको भेटपछि देउवाले पार्टीका शीर्ष नेताहरूलाई निवासमै बोलाएर छलफल गरेका हुन् ।

नेता प्रकाशशरण महतका अनुसार बैठकमा प्रदेश सरकार गठनको विषयमा प्रदेश प्रमुखहरूबाट भएका असंवैधानिक कदमबारे छलफल भएको थियो । प्रदेश सरकार गठनको विषयमा संविधानको बर्खिलाप काम भइरहेका छन्, सुदूरपश्चिम र गण्डकीमा पनि त्यस्तै काम भइरहेका छन् । त्यसैले संविधान विपरीत हुने कुनै पनि गतिविधि स्वीकार्य नहुने भएकाले त्यही अनुसार प्रस्तुत हुन सम्बन्धित प्रदेशका नेताहरुलाई निर्देशन दिनुपर्छ देउवाले भनेका थिए ।   

माधव नेपालले सभापति देउवासँग भेट गरेपछि सत्ता समीकरण र बाहिरी राजनीतिमा पनि विभिन्न चर्चाहरु सुरु भएका छन् । कांग्रेसले एमालेले साथ नदिएपनि सुदुरपश्चिममा मुख्यमन्त्रीका लागि सहयोग गर्ने बचन पनि दिएको छ । सभापति देउवाले कांग्रेसका नेताहरूलाई प्रदेशका  प्रमुखले संविधान विपरीत काम गरिरहेका विषयमा कडा रुपमा प्रस्तुत हुन र प्रदेशका नेताहरूलाई पनि परिचालन गर्न निर्देशन दिएका छन् ।