गठबन्धनमा सहमति जुटाएर मन्त्रिपरिषद् विस्तार गर्ने तयारीमा मुख्यमन्त्री सोडारी

१८ वैशाख, कैलाली । सुदूरपश्चिम प्रदेशका मुख्यमन्त्री दीर्घबहादुर सोडारीले सत्ता गठबन्धनमा सहमति जुटाएर मन्त्रिपरिषदलाई पूर्णता दिने तयारी थालेका छन् । उपनिर्वाचन निर्वाचनमा एमालेका दमनबहादुर भण्डारी जितेसँगै मुख्यमन्त्री सोडारीले सत्ता गठबन्धनको बैठक बोलाएका छन् । 

बैठकमा सरकार विस्तार, भागबण्डा र विश्वासको मत लिने विषयमा छलफल हुने माओवादी केन्द्रको संसदीय दलका उपनेता अक्कल रावलले जानकारी दिए । नागरिक उन्मुक्ति पार्टीबाट आज नै एक मन्त्री थप्ने सम्भावना रहेको उपनेता रावलको भनाइ छ । नाउपाबाट टीका थापालाई मन्त्री बनाइने सम्भावना छ । तर मन्त्रालय भने गठबन्धनको बैठकबाट मात्र तय हुनेछ । 

 यसअघि थापालाई विना विभागीय मन्त्री बनाउन लागिएको थियो । तर उनी विना विभागीय मन्त्रीको शपथ लिन अस्वीकार गरेकी थिइन् । सोडारी गत वैशाख ६ गते मुख्यमन्त्रीमा नियुक्त भएका थिए । उनले हालसम्म मन्त्रिपरिषद्लाई पूर्णता दिन सकेका थिएनन् ।