फुट्यो जनता समाजवादी पार्टी, ७ जना सांसद बोकेर राई पुगे निर्वाचन आयोग

२३ वैशाख, काठमाडौं । उपेन्द्र यादव नेतृत्वको जनता समाजवादी पार्टी  (जसपा) विभाजित भएको छ । पार्टीका नेता अशोक राई नेतृत्वको समूहले आधिकारिता दाबी गर्दै निर्वाचन आयोगमा निवेदन दिएका छन् । सरकारमा सहभागी हुने विषयमै जसपाभित्र विवाद थियो ।  

जसपासँग संघीय संसदमा १२ सांसद छन् । यो विभाजनको असर सत्ता समीकरणमा पर्नेछ । पार्टीका वरिष्ठ नेता अशोक राईको नेतृत्वमा नयाँ दल गठन गर्न विभाजित समूह निर्वाचन आयोग पुगेको हो । हाललाई नयाँ दलको नाममा नेपाल हटाएर जसपा मात्र राखिएको छ ।

विभाजनको पक्षमा ८ जना सांसद उभिएको राई पक्षले दावी गरेका छन् । यस मध्ये सात जनाले हस्ताक्षर गरिसकेका छन् । यसमा राईसहित प्रदीप यादव, सुशीला श्रेष्ठलगायत ८ जना भएको बताइएको छ । जसपा नेपालका अध्यक्ष उपेन्द्र यादव हाल अमेरिकाको भ्रमणमा छन् । उनी आजै राति नेपाल फर्कने कार्यतालिका छ ।

संघीय संसदका ७ जना सांसद सहित २९ जना केन्द्रीय कार्यकारिणी सदस्यहरू दल दर्ताका लागि निर्वाचन आयोगमा निवेदन दिएको सांसद प्रदीप यादवले जानकारी दिए ।

विभाजित दलमा सहभागी हुनेमा संघीय सांसदहरूमा अशोक राई, सुशिला श्रेष्ठ, प्रदीप यादव, नवलकिशोर साह, रञ्जुकुमारी झा, वीरेन्द्र महतो र हसिना खान छन् । प्रतिनिधि सभामा जसपाका १२ सांसद थिए । ७ सांसद विभाजित भएपछि जसपा नेपालको यादव पक्षमा ५ सांसद मात्र बाँकी छन् ।