हामी एक ढिक्का छौँ, जसपाको फुट निन्दनीय: नेकपा एस

२४ वैशाख, काठमाडौं । नेकपा एकीकृत समाजवादीले संसदीय दल एकढिक्का रहेको बताएको छ । पार्टीले वैशाख २८ गतेबाट सुरु हुने वर्षे अधिवेशनमा पार्टीका सांसदहरूले प्रभावकारी भूमिका निर्वाह गर्ने निर्णय गरेको छ ।

सोमबार बसेको सो पार्टीको संसदीय दलको बैठकले बजेट अधिवेशनमा पार्टीको भूमिका संसद्मा प्रभावकारी बनाउने निर्णय गरेको हो ।   

सत्तारुढ जनता समाजवादी पार्टी (जसपा) फुटेको भोलिपल्ट एकीकृत समाजवादीले संसदीय दलको बैठक बोलाएको थियो । संसदीय दलको बैठकले कानुन निर्माणको प्रक्रियामा सक्रिय भूमिका निभाउने निर्णय पनि गरेको छ ।

बैठकले सरकारले ल्याउने नीति, कार्यक्रम र बजेटबारे दलको तर्फबाट सरकारलाई रचनात्मक सुझावहरू दिने, संसद्को आगामी अधिवेशनमा जनसरोकारका विषयहरू सशक्त रूपमा उठाउने र कानुन निर्माण प्रक्रियामा सक्रिय भूमिका निभाउने निर्णय गरेको छ । 

जसपा सरकार र समाजवादी मोर्चामा समेत रहेको भन्दै उसले  ‘समाजवादी मोर्चा र सरकारमै सहभागी दलहरूलाई विभाजन गर्नेहरू जुन ढंगका गतिविधि जोजोबाट भएका छन्, यो निन्दनीय छ भनेको छ । यो राष्ट्रियतालाई कमजोर गर्ने र स्थायित्वका लागि भएका प्रयासलाई रोक्ने, कमजोर गर्ने खेल भएको समेत नेकपा एसको ठहर छ । 

उनले आफ्ना दल भने एकढिक्का रहेको बताए । जसपामा आएको फुटपछि आफ्नो दलबारे अफवाह फैलाइएको भन्दै उनले भने, ‘हाम्रो पार्टीका सांसदहरू कतै जानु भएको छैन, हामी एक ढिक्का छौं ।’