रविले चुनौती दिएपछि गगनले भने, ‘सबै स्वीकार छ, संसदीय समितिमा आउनुस्’

२८ वैशाख, काठमाडौं । सहकारी ठगी प्रकरणलाई लिएर नेपाली कांग्रेसका महामन्त्री गगन कुमार थापा र उपप्रधानमन्त्री तथा गृहमन्त्री रवि लामिछानेबीच दोहोरी चलेको छ ।

बर्खे अधिवेशनको पहिलो दिन शुक्रबार प्रतिनिधिसभाको बैठकपछि प्रतिक्रिया दिँदै गृहमन्त्री लामिछानेले गगन थापाले आफूले निवेदन दिएर ऋण लिएको प्रमाण देखाए राजनीति छोडिदिने बताएका छन् । उनले गगन थापालाई प्रमाण दिन चुनौती दिँदै प्रमाण देखाए राजनीति नै छोडिदिने र प्रमाण देखाउन नसके गगन थापाले राजनीति छोड्नु पर्ने बताए । 

उनले संसदमा एक पटक बोल्न खोजेकोमा बोल्न नदिएको गुनासो गर्दै सदनबाट भएको निरन्तर खेदाइलाई संसदबाटै जवाफ दिन खोजेको बताए ।

यता महामन्त्री थापाले सहकारी अनियमिततामा गृहमन्त्रीको संलग्नताबारे छानबिन गर्न संसदीय छानबिन समिति बनाए जुनसुकै चुनौती स्वीकार गर्ने बताएका छन् । उनले लामिछानेले  दिएको सबै चुनौती स्वीकार गर्न तयार रहेको बताएका छन् ।

संसद बैठकपछि सञ्चारकर्मीहरुसँग कुरा गर्दै थापाले भने, ‘संसदीय समितिबाट प्रमाणित गरे भइहाल्यो नि ! गगन थापालाई मात्र किन कांग्रेसलाई लज्जित गराइहाल्नुस् ।’ गृहमन्त्री लामिछानेले राज्यका संयन्त्रहरु प्रयोग गरेर जे(जे प्रमाण लुकाउनुपर्ने हो, लुकाइससकेको उनको दाबी छ । त्यसेले अब कांग्रेसले उनको राजीनामा पनि नमाग्ने भन्दै उनले भने, यति प्रमाण छ कि पुष्टि हुन्छ भन्ने विश्वास छ ।’

अब संसदीय समिति नबनेसम्म संसद नचल्ने थापाले बताए । साथै पेलेर जान खोजे यो विषय संसदमा मात्र सीमित नहुने भन्दै कांग्रेस महामन्त्री थापाले भने, ‘सडकमा आउँछ, त्यसअनुसार सामाना गर्न सरकारले तयार हुनुपर्छ ।’