संसदको गतिरोध अन्त्यबारे छलफल गर्न सत्ता पक्षका तीन नेता सिंहदरबारमा

३१ वैशाख, काठमाडौं । सरकारी ठगी प्रकरणको छानबिन गर्न संसदीय समिति गठन गर्ने कि नगर्ने भन्ने विषयमा छलफल गर्न सत्तापक्षका तीन नेता जुटेका छन् । प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली र रास्वपाका सभापति रवि लामिछानेबीच अहिले छलफल भइरहेको हो ।

संसदको अवरोधबारे निकास खोज्न सत्तारुढ प्रमुख घटकका शीर्ष नेता छलफलमा जुटेका हुन् । सिंहदरबारमा जारी बैठकमा नेपाली कांग्रेसले गृहमन्त्री रवि लामिछानेमाथि संसदीय छानबिन समितिको माग राखेर गरिरहेको विरोध र गठबन्धनको भावी कदमका बारेमा छलफल भइरहेको छ । 

भोलि राष्ट्रपति रामचन्द्र पौडेलले संघीय संसदको संयुक्त बैठकमा सरकारको नीति तथा कार्यक्रम पेश गर्ने कार्यसूची छ । संसदको गतिरोध अन्त्य सरकारको भूमिकामा निर्भर हुने कांग्रेसका नेताहरूले बताउँदै आएका छन् । प्रधानमन्त्रीले आज जसरी पनि सहमति जुटाएर कांग्रेसलाई खबर गर्ने आश्वासन दिएका छन् ।