राष्ट्रिय सभा अध्यक्षलाई कांग्रेसले दियो बैठक अवरुद्ध हुने जानकारी

१ जेठ, काठमाडौं । नेपाली कांग्रेसले राष्ट्रिय सभाका अध्यक्ष नारायणप्रसाद दाहाललाई बैठक अवरुद्ध गर्ने जानकारी दिएको छ । कांग्रेसले सरकारका नीति तथा कार्यक्रम प्रस्तुत गर्न दिने र त्यसपछि बस्ने बैठक भने अवरोध गर्ने जानकारी दिएको हो । मंगलबार अपराह्न ३ बजे संघीय संसदको संयुक्त बैठकमा राष्ट्रपति रामचन्द्र पौडेलले सरकारका नीति तथा कार्यक्रम प्रस्तुत गर्दैछन् ।

राष्ट्रिय सभामा कांग्रेस संसदीय दल नेता रहेका कृष्णप्रसाद सिटौलाले अध्यक्ष नारायणप्रसाद दाहालसँग नीति तथा कार्यक्रम पेस गर्दा अवरोध नगर्ने र त्यसपछि बैठक अवरोध गर्ने जानकारी गराएका हुन् । संयुक्त बैठकमा सरकारको नीति तथा कार्यक्रम प्रस्तुत हुँदा हामी अवरोध गर्दैनौं, धन्यवाद प्रस्तावका लागि बस्ने राष्ट्रिय सभा बैठकमा हाम्रो अवरोध रहन्छ, उनले भने । 

राष्ट्रिय सभा अध्यक्ष दाहालले राष्ट्रिय सभामा प्रतिनिधित्व गर्ने राजनीतिक दलका नेताहरूसँग संसद भवन बानेश्वरमा मंगलबार दिउँसो छलफल गरेका थिए । नीति तथा कार्यक्रम प्रस्तुत पछि लगत्तै प्रतिनिधि सभा र राष्ट्रिय सभामा बैठक बस्नेछ । उक्त बैठक दुवै सदनमा अवरोध गर्ने कांग्रेसको भनाइ छ । सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गर्दै आएको थियो ।