सर्वोच्च छल्न हतारिए प्रधानमन्त्री, के होला विश्वासको मत ?

७ जेठ, काठमाडौं । प्रधानमन्त्री पुष्पकमल दाहाल प्रचण्डले विश्वासको मत लिने प्रयोजनका लागि प्रतिनिधिसभाको बैठक आज  बस्दैछ ।  प्रधानमन्त्री प्रचण्डले विश्वासको मत लिने प्रस्ताव पेश हुने कार्यसूची रहेको छ । उपेन्द्र यादव नेतृत्वको जसपा नेपालले सरकार छोडेकाले प्रधानमन्त्रीले संविधान अनुसार विश्वासको मत लिन लागेका हुन् ।

१७ महिनाको बीचमा प्रधानमन्त्री प्रचण्डले चौथो पटक विश्वासको मत लिँदैछन् । तर, सहकारी ठगी प्रकरणमा प्रतिपक्षी दल नेपाली कांग्रेसको माग बमोजिम सरकार संसदीय समिति समिति गठन गर्न सहमत भएपनि समितिको कार्यादेशमा सहमति नभएकाले आजको बैठक बारे अन्योलता भने कायमै छ । संसदीय समिति गठनका लागि टीओआरमा सहमति नभएकाले नेपाली कांग्रेसले संसद अवरोध गर्नेछ ।  

प्रचण्डले प्रतिनिधिसभामा सोमबार विश्वासको मत लिने कार्यक्रम भए पनि कांग्रेससहित विपक्षी दलले संसद् अवरोध गर्न सक्ने संकेत दिएका छन् ।  कांग्रेसले संसदमा प्रतिनिधित्व गर्ने विपक्षी दलसँग सहकारी ठगी छानबिनका लागि संसदीय समितिको गठन र प्रधानमन्त्री प्रचण्डले विश्वासको मत लिने सन्दर्भमा आइतबार बिहान छलफल गरेको थियो । बैठकले उपप्रधान तथा गृहमन्त्री लामिछानेलाई बोल्न दिएपछि संसदीय छानबिन समिति गठन नभएसम्म कांग्रेसको मागलाई साथ दिने निर्णय गरेको थियो । 

कांग्रेसले संसद् बैठक सुरु हुनुअघि सहमति नजुटेमा संसदको काम कारबाही रोकिने बताएको छ ।  सरकारको नेतृत्व गरेको १७ महिनाको बीचमा चौथो पटक विश्वासको मत लिन लागेका प्रचण्डले सर्वोच्च छल्न हतार गरेका हुन् । पार्टी विभाजित भएपछि उपेन्द्र यादव नेतृत्वको जसपा नेपालले सरकारलाई दिएको समर्थन फिर्ता लिएका कारण उनले विश्वासको मत लिन खोजे पनि मुद्दा सर्वोच्चमा विचाराधीन छ । आज अर्को पनि सम्बन्धित मुद्दा पेशीमा छ । 

यादव नेतृत्वको दल विभाजनसम्बन्धी निर्णय कानुनी विवादमा परेकाले अशोक राई नेतृत्वको जसपाका सांसदले मत दिन पाउने कि नपाउने भन्ने बहस पनि राजनीतिक वृत्तमा छ । यादवले आइतबारै जसपा नेपालबाट अलग भएका ७ सांसदलाई विश्वासको मतदान प्रक्रियाबाट रोक लगाउन माग गर्दै सर्वोच्च अदालतमा रिट दायर गरेका छन् । उक्त रिटमाथि सोमबार नै प्रारम्भिक सुनुवाइ हुँदैछ । यस्तो अवस्थामा प्रधानमन्त्रीले आज विश्वासको मत लिन पाउँछन् वा पाउँदैनन् भन्ने अन्योलता बढेको छ ।