मार्शल लगाएर प्रतिनिधि सभाबाट धन्यवाद प्रस्ताव पारित, प्रधानमन्त्रीलाई स्कर्टिङ

८ जेठ, काठमाडौं । प्रतिनिधि सभाको आजको बैठक स्थगित भएको छ । अर्को बैठक जेठ ११ गते बस्नेछ । आजको बैठक पनि सभामुखले मार्शल लगाएर सञ्चालन गरेका थिए । मर्यादापालकको धकेलाधकेल बीच प्रधानमन्त्री पुष्पकमल दाहाल प्रचण्डलाई राष्ट्रपतिले गरेको सम्बोधनको प्रति टेबुल गर्न समय दिइएको थियो । कांग्रेस सांसदहरूले अवरोध गरिरहेका बेला सभामुखले प्रक्रिया अगाडि बढाएका हुन् । 

कडा सुरक्षाका बीचमा कांग्रेस सांसदहरूलाई मर्यादापालकले धकेलाधकेल गराउँदै प्रधानमन्त्री प्रचण्डलाई रोष्ट्रममा पुर्याएका थिए । प्रधानमन्त्रीले टेबुल गरेको प्रस्ताव सर्वसम्मतले पारित भएको सभामुखले घोषणा गरेका थिए । सभामुख देवराज घिमिरेले मंगलबार (आज) पनि प्रतिपक्षले वेल घेरेको समयमै बैठकका काम कारबाही सञ्चालन गरेका हुन् । 

घिमिरेले अवरोधमै संसद् सञ्चालन गर्दा प्रधानमन्त्री प्रचण्ड मार्सल लगाएर स्कर्टिङमा रोष्ट्रम पुगेका थिए । सरकारको नीति तथा कार्यक्रममा प्रस्तुत गरिदिएकोमा राष्ट्रपतिलाई धन्यवाद दिने प्रस्ताव राखेका थिए । उनले प्रस्ताव राखेपछि मार्सलकै सहारामा आफ्नाे आसनमा फर्किए ।

राष्ट्रप्रमुखलाई धन्यवाद दिने प्रस्ताव प्रमुख प्रतिपक्षसहित प्रतिपक्षीको नाराबाजीमै सभामुख घिमिरेले प्रस्तावलाई निर्णयार्थ प्रस्तुत गरे । सत्तापक्षका सांसदहरूले हुन्छ भने तर, विपक्षीको नाराबाजी चलिरहेका बेला सभामुखले हुन्न भन्ने आवाज नसुनिएको बताए । उनले नीति तथा कार्यक्रममा छलफलका लागि अर्को बैठक यही जेठ ११ गते तोकेका छन् ।