कार्यदलमा सहमतिको सकस , गोलमटोल कुराले छानबिन अगाडि बढ्न सक्दैन : कांग्रेस

१० जेठ, काठमाडौं । सहकारी ठगी प्रकरणलाई लिएर छानबिन गर्न गठन गर्ने भनिएको संसदीय समितिको कार्यादेश (टिओआर) बनाउन कार्यदलको बैठक पटक–पटक बसे पनि सहमतिको विन्दु पहिल्याउन सकेको छैन । 
सत्ता पक्ष र प्रतिपक्ष दुवै संसदीय छानबिन समिति बनाउन सहमत भए पनि कार्यक्षेत्रबारे कुरा नमिल्दा टिओआरको खाकालाई पूर्ण रुप दिन सकेको छैन । कानून मन्त्रालयमा आज बसेको बैठकमा सहमति जुट्ने सम्भावना रहेको बताइए पनि अन्ततः बैठक निष्कर्ष विहीन हुन पुग्यो । बैठक भोलि फेरी बस्ने बताइएको छ । 

आजको बैठकपछि कांग्रेस सहमहामन्त्री जीवन परियारले आफूहरू गृहमन्त्री रवि लामिछानेकै नाम लेख्नुपर्ने अडानबाट पछि नहटेको बताए । उनले छानबिन समितिमा गृहमन्त्रीको नाम किटान नभएसम्म आफूहरू नमान्ने अडान सुनाए ।

उनले थपे, ‘हामीले जसका बारेमा छानबिन बनाउनुपर्छ भनेर उठाएका हौं । त्यो नभएसम्म हामी मान्दैनौँ भनेका छौं । सत्तापक्षलाई आज पनि त्यही कुरा राखेका छौं । उनले गोलमटोल भाषाले छानबिन अगाडि बढ्न नसक्ने बताएका छन् ।  

यता राष्ट्रिय स्वतन्त्र पार्टीका सांसद शिशिर खनालले भने छानबिन समितिमा सहकारीको नाम राख्ने तर व्यक्ति केन्द्रित छानबिन समिति नबनाउने आफूहरूको प्रस्ताव रहेको बताए । व्यक्ति केन्द्रित हुँदा त्यो न्यायोचित नहुने र सुरुमै प्रिजुडिस गर्छ भन्ने आफुहरुको भनाइ रहेको उनले बताए । कार्यदलमा रहेका एमाले सांसद महेश बर्तौलाले आजको छलफल सकारात्मक भएको र भोलि सहमति हुने सम्भावना रहेको बताए ।