बूढानीलकण्ठका मेयरसहित तीन वडाअध्यक्षलाई एक महिना कैद गर्न अदालतको आदेश

 १३ जेठ, काठमाडौं । जिल्ला अदालत काठमाडौंले बुढानीलकण्ठ नगरपालिका मेयर मिठाराम अधिकारीसहित तीन जना वडाध्यक्षलाई एक महिना कैद सजाय सुनाएको छ ।  न्यायाधीश डा. राजेन्द्र कुमार आचार्यको इजलासले मेयर अधिकारीसहित तीनजना वडाध्यक्षलाई एक महिना जेल सजाय हुने फैसला सुनाएको हो ।

 वडाध्यक्षहरू नवराज भट्टराई, सुमन तामाङ र चन्द्रमान श्रेष्ठलाई सजाय सुनाएको हो । 

अदालतले चलन चलाइदिनू भनेको जग्गा हालसम्म नछाडेको र विवादित क्षेत्रमा रहेका संरचनाहरु हटाउन भनेकोमा त्यसो समेत नगरेकोले यसलाई अदालतको अवहेलना भनेको छ ।
  
जिल्लाले यसअघि गरेको फैसला कार्यान्वयन गर्न अटेर गरेको भन्दै नगरपालिकाको नेतृत्वलाई अदालतले सजाय सुनाएको हो ।  

‘अदालतको फैसला नमान्ने तथा कार्यान्वयनमा अटेर गर्ने देहायका प्रतिवादीहरूलाई मुलुकी देवानी कार्यविधि संहिता २०७४ को दफा २३८ (१६) अनुसार जनही १ महिना कैद हुन्छ’, फैसलामा भनिएको छ ।   उक्त कैद लगत कसी प्रहरीमार्फत पक्राउ गरी असुल उपर गर्न पनि भनेको छ ।