सर्वोच्चबाट पत्र पुगेपछि गण्डकीमा कांग्रेसका पाण्डेले मुख्यमन्त्रीको शपथ लिने

१६ जेठ, पोखरा । नेपाली कांग्रेस गण्डकी प्रदेश संसदीय दलका नेता सुरेन्द्रराज पाण्डेले बुधबार मुख्यमन्त्रीमा शपथ लिँदैछन् । सर्वोच्च अदालतले कांग्रेस नेता पाण्डेलाई मुख्यमन्त्री नियुक्त गर्न परमादेश जारी गरेको थियो । उक्त परमादेश अनुसार आजै साँझसम्म गण्डकीका प्रदेश प्रमुखले पाण्डेलाई मुख्यमन्त्रीमा शपथ गराउने भएका छन् । 

सर्वोच्चले मुख्यमन्त्रीमा नियुक्तिका लागि पत्र पठाएपछि शपथ गराउने तयारी भएको छ । प्रदेश प्रमुख कार्यालयले सर्वोच्चको पत्र पाए लगत्तै शपथको तयारी गर्ने जनाएको छ । सर्वोच्चले सोमबार फैसलाको संक्षिप्त पाठ सार्वजनिक गरेको थियो । मंगलबार सार्वजनिक बिदा भएका कारण औपचारिक पत्र आज मात्र पठाउनेछ । 

सर्वाेच्च अदालतले गण्डकीका मुख्यमन्त्री खगराज अधिकारीलाई पदमुक्त गर्दै प्रदेश सभाको ठूलो दल कांग्रेसका संसदीय दलका नेतालाई ४८ घण्टाभित्र मुख्यमन्त्री नियुक्त गर्न परमादेश दिएको थियो ।  न्यायाधीशद्वय कुमार रेग्मी र सुनीलकुमार पोखरेलको सोमबारको संयुक्त इजलासले मुख्यमन्त्री अधिकारीले लिएको विश्वासको मत अवैधानिक ठहर गर्दै नयाँ सरकार गठनको प्रक्रियामा जान आदेश गरेको हो ।