माधव नेपालको ओहोर-दोहोरले सत्ता समीकरणमा तरंग

१७ जेठ, काठमाडौं । नेकपा एकीकृत समाजवादीका अध्यक्ष माधवकुमार नेपालको राष्ट्रिय राजनीतिमा भइरहेको ओहोर-दोहोरले सत्ता समीकरणमा फेर तरंग उत्पन्न गराएको छ । नेपालको सत्तापक्ष र विपक्षी दलसँगको असमान सामिप्यताले केन्द्रदेखि प्रदेशसम्मका सरकारमा हलचल ल्याउने संकेत गरेको छ । प्रधानमन्त्री पुष्पकमल दाहाल प्रचण्डलाई विश्वासको मत दिँदा पार्टीमा ह्वीप लगाएका नेपालको झुकाव भने विपक्षीतिरै देखिएको छ ।    

सत्ता समीकरणमा रहेर पनि उनले समय समयमा तरंग ल्याउन काम गरिरहेका छन् । अध्यक्ष नेपालको दोहोरो भूमिकाका कारण सुदुरपश्चिममा एमाले सरकारमा सहभागी हुन सकिरहेको छैन भने मधेशमा सत्तापक्ष सरकार बनाउने कुरामा कमजोर हुने देखिएको छ । मधेशमा सरकार बनाउने विषयमा उनले बुधबार नेपाली कांग्रेसका सभापति शेरबहादुर देउवासँग भेट गरेका थिए । यो भेटलाई काउण्टर दिन बिहीवार बिहान नेकपा एसका सम्मानित नेता झलनाथ खनालले प्रधानमन्त्री पुष्पकमल दाहाल प्रचण्डसँग भेट गरेका छन् । दुबै भेट सत्ता समीकरणको राजनीतिसँग जोडिएको छ । 

नेपालको राजनीतिक चलखेलबाट अतालिएका प्रधानमन्त्री प्रचण्डले पनि नेता खनालसँग उनका विषयमा कुरा राखेका थिए । एकीकृत समाजवादी यही समीकरणमा रहन्छ भनेर विश्वास दिलाउन खनाल बालुवाटारमा गएका थिए । बिहान ९ बजेदेखि करिब ४५ मिनेट भएको भेटवार्तामा समसामयिक राजनीतिक विषयमा छलफल गरिएको खनालको सचिवालयले जनाएको छ । संघीय र प्रदेश सरकारलाई सुदृढ बनाउँदै लैजाने विषयमा नेपालले बखेडा झिकिरहेको विषयमा छलफल भएको बताइएको छ ।

नेपाल बुधबार देउवाको निवास बूढानीलकण्ठमा विपक्षी दलको बैठकमा सहभागी भएका थिए । मधेस सरकारको विश्वासको मतका विषयमा नेपालसहित विपक्षी दलका नेताहरूबीच छलफल गरिएको नेताहरूको भनाइ छ । नेता नेपाल हिजो बूढानीलकण्ठ पुगेपछि प्रधानमन्त्रीले खनाल बालुवाटार पुगेर छलफल गरेका हुन् ।

यता, आजै विराटनगर पुगेका प्रधानमन्त्री प्रचण्डले नेपाल वर्तमान समीकरण भन्दा बाहिर नजाने बताएका छन् । बिहीबार बिहान आफूसँग कुराकानी हुँदा नेपालले समीकरण भन्दा बाहिर नजाने भनेर स्पष्ट पारेको प्रचण्डको भनाइ थियो । माधवजी अलि पहिलेदेखि नै उतापनि यतापनि दुबैतिर जोडिने जस्तो देखिएको त थियो । तर, अहिले बिहान मेरो कुरा हुँदाखेरि माधवजीले यो समीकरण भन्दा बाहिर छैन र हुन्न भन्ने कुरामा क्लियर गर्नुभएको छ, प्रचण्डले भनेका छन् । यसले पनि नेपालका कारण सत्ता समीकरण तनावमा छ भन्ने कुरा देखाएको छ । 

नेपालले विश्वास दिलाए पनि मधेसमा समीकरण भन्दा बाहिर नपाल जाँदैनन् भन्ने विश्वास प्रधानमन्त्रीलाई छैन् । नेपाल समीकरण भन्दा बाहिर गए भने मधेसमा सत्ता पक्षको सरकार बन्दैन । केन्द्रमै पनि नेपालले कुन बेला गडबडी गर्ने हुन भन्ने आशंका प्रधानमन्त्रीमा छ । खासमा एमाले अध्यक्ष केपी शर्मा ओलीलाई दवावमा राख्ने नेपालको उद्देश्यले पनि समीकरण खटपट र दवावमा परिरहेको छ ।