मधेशमा सत्तापक्षको सरकार बनाउन माधव नेपालसँग प्रचण्डले मागे सहयोग

२१ जेठ, काठमाडौं । प्रधानमन्त्री पुष्पकमल दाहाल प्रचण्डले नेकपा एकीकृत समाजवादीका अध्यक्ष माधवकुमार नेपालसँग मधेश प्रदेशमा जसपाको सरकारलाई दिएको समर्थन फिर्ता लिन आग्रह गरेका छन् । मधेशमा जसपालाई दिएको समर्थन फिर्ता लिएर सत्तापक्षका दलहरूको नेतृत्वमा सरकार गठन गर्ने वातावरण मिलाउन उनले आग्रह गरेका हुन् ।   

प्रधानमन्त्रीको सरकारी निवास बालुवाटारमा सोमबार बिहान प्रधानमन्त्री प्रचण्ड र अध्यक्ष नेपालबीच  भएको छलफलमा यस्तो आग्रह गरिएको हो । मधेस प्रदेश सरकार गठन र सुदूरपश्चिम प्रदेश सरकारको विस्तारबारे छलफल भएको प्रधानमन्त्रीको सचिवालयले जाएको छ । सुदुरपश्चिममा एमाले र माओवादीले निर्णय नगर्दा सरकार विस्तार हुन सकेको छैन ।  

मधेसमा एमाले र माओवादीले एकीकृत समाजवादीलाई सरकारबाट फिर्ता भएर नयाँ सरकार गठनका लागि सहजता प्रदान गर्न आग्रह गर्दै आएका थिए । आज पनि यही विषयमा छलफल भएको छ । तर एकीकृत समाजवादीले मधेसमा पुरानो समीकरण अनुसार बनेको जसपा नेपाल नेतृत्वको सरकार छाड्न सकिरहेको छैन । मधेसमा सरकार अल्पमतमा परिसकेकाले नयाँ बनाउने कसरत भइरहेको छ । 

नेपालले प्रधानमन्त्रीलाई सोमबार दिउँसो बस्ने सचिवालय बैठकमार्फत निर्णय गर्ने जानकारी गराएका छन् । मधेस सरकारबाट फिर्ता हुने निर्णय हुन्छ । तर, हामीले मागेको मन्त्रालय दिनुपर्छ । प्रचण्डसँगको छलफलमा नेपालले भनेका छन् । विपक्षी गठबन्धनबाट सरकार बनाउने विषयमा नेपालले कांग्रेस सभापति शेरबहादुर देउवासँग छलफल गरेपछि प्रचण्ड नेपाललाई फकाउन लागिरहेका छन् ।