विश्वासघात गरी एक करोड ठगेको आरोपमा चलचित्र निर्देशक सुदर्शन थापा पक्राउ

२१ जेठ, काठमाडौं । फिल्म ‘प्रसाद २’ को विषयलाई लिएर प्रहरीले फिल्म निर्देशक सुदर्शन थापालाई पक्राउ गरेको छ । उनलाई मालीगाउँ प्रहरीले पक्राउ गरेको हो । उनलाई बालुवाटारको रोयल अम्पायर होटल परिसरबाट पक्राउ गरिएको हो । गत वर्ष रिलिज भएको फिल्म ‘प्रसाद-२’को लेनदेनको विवादमा उनलाई प्रहरीले नियन्त्रणमा लिएको हो । 

उनलाई फिल्म ‘रावायण’को दोस्रो चरणको छायांकन सुरु गर्ने क्रममा पक्राउ गरी प्रहरी वृत्त बौद्धमा लगिएको छ । आफूहरुको मञ्जुरीबिना फिल्मलाई देश तथा विदेशमा प्रदर्शन गरेर एक करोड ५० रुपैयाँ ठगी गरेको भन्दै निर्माता सुदर्शन बस्नेत र ज्याक श्रेष्ठले मुद्दा हालेका थिए । 

गत साउन १० गते जिल्ला प्रहरी परिसर, काठमाडौंमा ठगी तथा आपराधिक विश्वासघातको जाहेरी दिएका थिए । थापा प्रसाद २ का निर्देशक पनि हुन् । यसबारे अनुसन्धान गरिरहेको प्रहरीले उनलाई पक्राउ गरेको हो । 

आजदैखि सुरु हुन लागेको उनी निर्देशित ‘रावायण’को दोस्रो चरणको छायांकनअघि प्रहरीले उनलाई पक्राउ गरेको हो । निर्देशक थापा पक्राउपछि फिल्मको छायांकन रोकिएको छ ।